Mizoram-ah Employees' State Insurance Corporation (ESIC) Hospital din a ni dawn niin a lang
New Delhi-a cham mek Labour, Employment, Skill Development & Entrepreneurship (LESDE) Minister Lalnghinglova Hmar chuan niminpiah khan Labour & Employment leh Sports Minister Dr. Mansukh Mandaviya chu a chenna In-ah kawmin LESDE Minister chuan Mizoram-ah Labour-te hamthatna tur zawnga sawrkar laipui rawtna chak taka bawhzui a nih mek dan te, Mizoram Building and Other Construction Workers Welfare Board-a inziaklut an pun chak dan leh an hamthatna tura ruahmanna thar siam a nih dante a hrilh a. Tunhnaiah nasa takin Employees' State Insurance Corporation (ESIC) hnuaiah registration a pun thu leh hmuh theiha hmasawnna a awm thu hrilhin, “Mihring cheng kan tlem avangin ESIC Hospital din tura tehna ah Mizoram tan tlin a harsa a, a mihring inziaklutin kan tlin chiah lo chung hian kan hmasawnna enin ESIC Hospital din dan min ngaihtuahsak rawh,” tiin a ngen a ni.
Union Labour Minister Dr. Mansukh chuan LESDE Minister ngenna hi tihhlawhtlin a tum thu leh ESIC Meeting awm leh hunah Hospital pek tum a nih thuin Minister hi a lo chhang a, Mizoram-a Labour Welfare chungchanga hmalakna leh hmasawnna chu Delhi atanga an lo hriat thute a sawi bawk a ni.
Sports and Youth Services Minister ni bawk Lalnghinglova Hmar chuan Khelo India hnuaia sawrkar laipuiin sum thahnem zawk a neih tak avanga Mizorama Sports infrastructure dinna tura ruahmanna siamte Union Sports Minister hnenah hian a thehlut bawk a, Khelo India Fund hman theih a nih hunah Mizoram chu ngaih pawimawh hmasak zingah an telh dawn tih Union Sports Minister chuan a lo hrilh a ni.
Sports and Youth Services Minister leh Mizoram Olympic Association (MOA) President Lalnghinglova Hmar hi Indian Olympic Association (IOA) Special General Body Meeting leh Asian Games-a India infiammite tirhchhuahna hun The Ashok Hotel, New Delhi-a neih ah MOA Secretary General V Lalzawmliana nen an tel nghal a. Boxing Federation of India President Ajay Singh nen Mizoram Boxing hruaina kawnga harsatna awm mek chinfel dan an sawidun a; Cycling Federation of India hotute nen an hnuaia Mizoram Cycling Association-te inziahluh theih dan an sawi bakah Hockey India President Dilip Tirkey nen Mizorama Hockey hmasawnna an sawi a; All India Football Federation (AIFF) President Kalyan Chaubey nen Football thil pawimawhte an sawi bakah Sports Ministry hotu liante nen an inkawm nghal bawk a ni.
Asian Games hi September 19 atang khian Nagoya, Japan-ah neih tur niin Mizoram atangin Hockey player pahnih Lalremsiami Hmar leh Lalthantluangi-te an tel ve dawn a ni.