MADC-ah MDC ni chunga MLA emaw, MP emaw nih khawp theih lohna turin Dan siam a ni
Nimin chawhma dar 10:30 khan MADC Emergency Session chu Siaha-a MADC Session Hall-ah neih a ni a, he Session-ah hian Mara Autonomous District Council (Constitution, Conduct of Business, etc.) (Seventh Amendment) Rules, 2026 chu lungrual takin pass a ni. MADC-in Major Provisions of Rule 11-a a tarlan angin tupawh Member of District Council (MDC) chu State Legislative Assembly emaw, Parliament-ah emaw Member nih kawp phal a ni lovang (Among the major provisions passed by the Council is a restriction on dual membership. Under the amended Rule 11, no person Shall simultaneously be a member of the District Council and State Legislative Assembly or Parliament) tih a ni. He thutkhawm hi MADC Deputy Chairman. C. Chehnei chuan a kaihruai a, Member thahnem takin thu an sawi a ni.
Hetihlai hian Lai Autonomous District Council (LADC) Chairman C. Lalmuanthanga chuan tun dinhmunah Mizoram-a Autonomous District Council pathumte chuan MDC leh MLA nih kawp theihlohna Dan an nei lo tih nimin-a Akashvani Correspondent in a kawmna ah a sawi a. LADC Chairman chuan tunhnaia Supreme Court thuremna ah District Council leh Legislative Assembly-a Member nihkawp theihlohna Dan hi Lai ADC-ah hman mek a nih thu leh Chakma leh Mara Autonomous District Council-ah te an Dan tidanglamin, Member nihkawp theihna an neih chu thla thum (3) chhunga siamtha tura tih a ni tih a sawi a, Supreme Court-a thuthlentu lam hian LADC-ah Member nihkawp theih lohna hmang mek angin an sawi a, hei hi Dan hlui, hman tawh loh a behchhan nia a rinthu a sawi a ni. LADC, Constitution, Conduct of Business Rules 2002-ah chuan Member nihkawp theihlohna dan hi LADC in a nei tih sawiin, CCB Rules hi kum 2010-ah enthata, siam danglam ngaite siam danglam niin, Dan hman mek ah chuan MLA leh MDC nih kawp theihlohna Dan hi LADC in a nei lo tih a sawi a, Chakma leh Mara ADC te pawhin Member nih kawp theihlohna Dan hi an nei lo tih a sawi a ni.