Lunglei-ah State Level Seminar on Mizo Tawng nei

Mizoram sawrkar Art & Culture (A&C) Department leh Mizo Academy of Letters (MAL), Joint Headquarters, Lunglei huaihawtin nimin khan Lunglei Venglai-a A&C Auditorium-ah Mizo tawng chungchang zirhona, ‘State Level Seminar on Mizo tawng’ neih a ni a, Lunglei Govt. College (LGC)-a Assistant Professor Rochharzela buatsaih, ‘Mizo tawng tobul, humhalh leh tih hmasawn’ tih te, TC Jonunsanga buatsaih, ‘Mizo tawng nihphung, danglamna leh mawina’ tih leh Vanneihtluanga buatsaih, ‘Mizo tawng leh tunlai thiamna’ tih te zirho a ni. He Seminar hi MAL Jt. Hqrs. Lunglei President C. Hrangdula chuan kaihruaiin YMA Sub-Hqrs. Lunglei President, K. Lalfakzuala chu khuallian a ni a, Tawng dang thiam avanga mahni hnam tawng thiam lo chu mi chanve an ni tih sawiin, “Hnam hrang hrang tawng hi Pathianin a pawm avangin mahni tawng kan zahpui tur a ni lova, kan humhalh tlat zawk tur a ni,” a ti bawk.