Kum 7 chhung Aizawl Treasury Square-a lo duty tawh Bawrhsap in chawimawi

Aizawl District Bawrhsap Er.Lalhriatpuia IAS chuan kum 7 chhung Aizawl Treasury Square leh a chhehvela chhum lo chat lova ruihhlo leh sual rem theih nana lo duty tawh mi 15 te chu nimin khan thingpui a inpui a. District Administration-in an inpekna an ngaihhlutzia lantir nan chawimawina thuziak (Letter of Appreciation) pein, duty te thingpui inna tur Rs.15,000/- a hlan bawk.
Aizawl DC Conference Room-a he hun hman ah hian Aizawl Bawrhsap chuan an lawmthu sawina chu beitham hle mah se, khawtlang tana an inpeknaa an lawmzia, hlutzia leh ngaihsanzia lantirna (Token of Appreciation) a nih avangin pawmsak ngei tura a beisei thu sawiin, an kal zelna turah duhsakna a hlan a. “Tunhnaiah Mizoram dung leh vangah ruihhlo a hluar em em a, a dona kawngah nasa taka tanho a tul hle a. Ruihhlo do kawngah Venghlui Paho Zing Duty chuan kum sarih chhung hma in lakna te ka lo hriatin ropui ka ti hle a, in inpekna avangin nasa takin ruihhlo hluar zel tur pawh tihremin a awm ka ring tlat a ni,” a ti bawk.

He hunah hian Venghlui Paho pawhin report pein, duty hi July ni 27, 2019 atanga an lo kalpui tawh thu te, a tirah chuan Welfare leh Section ang tein hma lain, tunah chuan Branch YMA-a OB nilai leh Ex-OB te nen Paho ten mahni thahnemngaihna atangin an kalpui mek zel tih an sawi a. An hmalakna DC in a hlutsaka a, a hriatpui chu lawmawm an tih thu an sawi bawk a. Aizawl DC hnenah hian Treasury Square leh a chhehvel a lo him zawk theih nana thurawn an neih te an thlen bawk a ni.