IOA Dan siamthar MOA in hmang ve dawn

Mizoram Olympic Association (MOA) chuan General Body Meeting neiin Indian Olympic Association in inthlan dan kalphung a siam thar chu sawihoin MOA inthlan dan kalphung a siam tha nghal.
Niminpiah khan Aizawl-a Mizoram State Sports Council (MSSC) Hall-ah Mizoram Olympic Association General Body Meeting hi an President leh Sports Minister, Lalnghinglova Hmar hova neih a ni a, MOA President chuan, “Mizoram chhunga Sports Association hrang hrang kan inenkawl dan kan hria, sawrkarin sports-ah sum tam tak seng reng chung siin hmasawnna kan nei lo. National Games-ah leh Olympic-ah Mizo kan thleng chho thei lo. Sports Association kalphung hi kanin enfiah a ngai. Tuna kan kal dana aia tha zawk hi enge ni ang? National Games-ah leh Olympic ah tun aia thahnem zawk Mizoram infiammi te an tel theihna turin ngaihtuahna kan sen a ngai hle,” a ti.

Indian Olympic Association (IOA) chuan National Sports Governance Act (NSGA) 2025 zawm turin Danpui a siam tha a, September 8, 2026-a Special General Body Meeting-ah pawmin Indian Olympic Association danpui siamthar mila MOA Danpui siamtha turin chhawpchhuah a ni a, hei hi an sawiho hnuah an pawm a ni.

MOA in Danpui a siamthar ang chuan Officer Bearer ten term 3 an chelh zawh ah chawlh (cooling-off) an nei tawh tur a ni a. MOA Executive Committee Member-ah mi 15 aia tam lo an ni tawh tur a ni a, Member 2 tal chu Infiamna lama mi chhuanawm bik (Sportspersons of outstanding merit) an ni tur a ni a, Member 2 tal chu Athlete Commission atanga anmahni zinga inthlanchhuah an ni tur a ni bawk. Ex-Officio leh member dangte chu International Charter leh Danpui leh by-laws anga thlan an ni ang a; Member 4 tal chu hmeichhia an ni tur a ni.

Executive Committee hna chelh hun chhung chu kum 4 aia tam tur a ni lo a. Kum 70 tling tawh chu Office Bearer nihna chelh emaw, Executive Committee member nihna atana thlan theih a ni tawh lo bawk a. He Dan thar siam hi National Level-a Federation ten hmang tura an tih chuan State Level-ah pawh hman tur a ni ang. Mizoram Olympic Association hnuaiah hian Athletic, Archery, Badminton, Football, Fencing, Karate, Judo, Wrestling, Weightlifting, Hockey, Table Tenis, Taekwonko, Tenis, Basketball, Volleyball, Riffe Association te an awm mek a ni.