Dan kalha infiammi intihchakna hman do a ngai
Mizoram sawrkar Sports and Youth Services Department buatsaihin nimin khan Aizawl-a Commissioner of State Tax Conference Hall-ah ‘Education and Awareness Session on Doping’ neih niin he hun hmanpuitu Sports Minister Lalnghinglova Hmar chuan infiamna dan kalha intihchakna (doping) chu Mizoram-ah chuan infiamna ah mi tam tak tan thil thar a ni tih sawiin, “A thlen hmaa kan do a, Awareness a bik takin Coach ten kan neih that a pawimawh a ni,” a ti a. National Anti- Doping Agency chuan doping chu infiammi ten an hman loh nan leh dik leh fair taka inelna a awm theih nan nasa takin hma a lak thu leh inhrilhhriatna hun buatsaih a ni chu alwmawm a tih thu a sawi bawk.
Sports Minister Lalnghinglova Hmar chuan Sawrkar Laipuiin kum 2036-ah India ramin Olympics thlen tumin hma à la zel tih pawh sawiin, Mizoram Sawrkar pawhin Mizo infiammite India aiawha an tel ve ngei theih nan theihtawp a chhuah zel thu leh Empower Mizoram Sports chu kalpuiin Sports discipline 8 hnuaiah naupang kum 8-15 inkar training ngawr takin pek an nih thu a sawi bawk a. International level thleng pha tur chuan Trainers leh Coach te tan tlan a ngaih thu leh tun anga theihtawp an chhuah chuan infiamna lamah Mizo te chuan nasa takin hma kan sawn zel a beisei thu a sawi bawk.
He hun hi Sports and Youth Services Director, Henry C. Lalrawnkima chuan kaihruaiin Resource Person Pankaj Singhal, Dope Control Officer cum Educator, National Anti-Doping Agency chuan Trainers leh Coach kalkhawm mi 75 te zirtirna a pe a ni.