Chief Minister in State Human Rights Commission a kawm
Mizoram State Human Rights Commission Chairperson Justice Marli Vankung, Former Judge, Gauhati High Court leh Member Vanlalenmawia, MJS (Rtd.) K. Lal Nghinglova, IAS (Rtd.) te hi kumin July ni 29 khan Mizoram Larsap General (Dr) Vijay Kumar Singh chuan rinawmna thu tiamtirin a lalut a, nimin-a Chief Minister in a kawmna ah hian Chief Minister chuan lawmpuina leh an kal zelna tura duhsakna a lo hlan a. Hna an thawhna atana an mamawhte sawipuiin, an mamawh zualpuite chu a ranglama ngaihtuah a nih tur thu a hrilh a ni.
MSHRC Chairperson Justice Marli Vankung chuan Mizoram State Human Rights Commission hmasa ber atana sawrkarin a ruat avangin Chief Minister hnenah hian lawmthu a sawi a. “Phur taka thawh kan tum a, Complaint pawh pathum kan dawng tawh a ni. Commission thar a nih avangin thawktuah leh hmanraw lamahte mamawh eng engemaw kan nei a, lawmthu rawn sawi pahin chung kan mamawh zualpuite kan rawn thlen a ni,” tiin an mamawh hrang hrangte a tarlang a, Inkawmna hun tha tak a buatsaihsak avangin lawmthu a sawi bawk.