Aizawl-ah PM Vishwakarma Tribal Artisan Empanelment Mela neih a ni
PM Vishwakarma Tribal Artisan Empanelment Mela hawnna hunah hian Dr. H. Lianzela chuan he Mela-a tel Artisan leh Entrepreneur te chu an kutchhuakin belhchian dawl se, a leitu tur mipuiten lei nawn leh an chak theih nan quality tha taka siam turin a chah a. Tun aia tam siamchhuak thei tura ruahmanna siam tur leh khawvel ram zau zawka hralhchhuak thei tur khawpa nasa lehzuala tang turin a fuih a ni.
He Mela hi Commerce, Industries, Geology & Mining Department, Tribal Cooperative Marketing Development Federation of India Limited (TRIFED), Ministry of Tribal Affairs, DFO Branch MSME Aizawl te leh State Monitoring Unit, PM Vishwakarma te tangho in an huaihawt a ni a. Mela-in a tum ber chu TRIFED te leh PM Vishwakarma hnuaia Mizoram artisan-te leh entrepreneur te insumdawntawn dan tur kawng hawn a ni.
TRIFED hian India rampum ah outlet ‘Tribes India’ tih hming puin hmun 110 velah an nei a. An hnuaia inziaklutte atang hian an bungraw zawrh tur hi an lei khawm thin a. Aizawl-a Mela buatsaih ah hian artisan 28 an tel a. Heng artisan-te hi TRIFED aiawh lo kalte nen inkawmna hun siamsak an ni a, an thilsiam chhuahte hi TRIFED outlet-a zawrh theih tur chi te a nih chuan TRIFED hnuaiah hian inziaklutin an thilsiam te an phochhuak ve thei tawh dawn a ni. Nimin-a he hun hman hi Commerce, Industries, Geology & Mining Department-a Joint Secretary H. Lalchhandami chuan a kaihruai a ni.