Vawiin-ah Kristian Hla Bu hralhchhuah tan tum a ni

Mizoram Presbyterian Kohhran leh Baptist Church of Mizoram (BCM) tangkawp buatsaih, ‘Kristian Hla Bu’ chhut thar chu Vawiin hian hlanna leh tlangzarhna hun hmangin mipuite hnenah hralhchhuah tan a ni dawn.
Mizoram-a Kohhran lian pahnih ten an hman ‘Kristian Hla Bu’ hi Vawiin August 13, 2026 chawhnu dar 1:00 hian Synod Moderator Rev. John Raldosanga chuan Aizawl Mission Veng-a Biak In-ah hlanna leh tlang-zarhna hun a hmang dawn a, hemi hnu hian hralhchhuah nghal tura ruahman niin Aizawl bakah Mizoram hmun hrang hranga Synod Bookroom-ah te pawh hralhchhuah nghal a ni dawn a, Synod Bookroom Serchhip Branch-ah pawh Vawiin chawhnu lam hian Kristian Hla Bu thar hi hralhchhuah hman tura ruahman a ni.

Synod Bookroom Serchhip Branch-a thawk te chuan Kristian Hla Bu hralhchhuah tur hi Serchhip rawn thlenpui a nih tawh thu LENKAWL hrilhin tun tumah hian a man tlawm ber chi (Ordinary) chauh ala rawn thleng tih an sawi a, Ordinary hi a kawm Plastic chi niin a bu lian ber chi bu 1000; a laihawl bu 1200 leh a te ber bu 1800 vel a rawn thleng tih an sawi a. A bu lian ber (large size) hi Rs. 350/- man niin a laihawl (Compact Size) hi Rs. 300/- leh a te (pocket size) Rs. 250/- a hralh-chhuah tur a ni tih an sawi a. Tuna rawn thleng bak pawh hi rawn thleng leh nghal mai tura beisei a nih thu an sawi a ni.

Kristian Hla Bu tharah hian Hla 650 a awm tawh dawn a, Hla thar 70 belhin a hma a awm Hla 20 paih a ni thung a. Hla bu-a dah tharte hi tunlai hla leh thalai lamin an sak uar deuhte an ni ber tih a buaipuitute chuan an sawi a. Hla bu thar chhutna atan hian Mizoram Synod chuan cheng nuai 70 a ruahman a. Mizoram-ah a chhut theih loh avangin Swapna Printing Press, Kolkata-ah chhut a ni. KHB hi a tum khatna atan bu nuai thum chhut phawt a ni a, a tul ang zela la chhut nawn zel tura ruahman a ni bawk.