Tourism Department leh Central YMA in thawhdunna thuthlung an ziak
Tourism Minister Lalnghinglova Hmar Pisa-a thawhhona thuthlung (Memorandum of Understanding) an ziah ah hian Tourism Department aiawhin Commissioner Vanlaldina Fanai chuan a hming ziakin Central YMA aiawhin President R Lalngheta chuan a hming a ziak bawk a, Tourism Department lam hotute leh Central YMA hruaitute an tel a ni.
Thawhhona thuthlung ziahna hunah hian Tourism Minister Lalnghinglova Hmar chuan Tourism chungchang ah Central YMA leh Tourism Department ten thawhhona thuthlung an ziak thei chu lawmawm a ti takzet tih a sawi a. “Tunhnaiah kan State-ah Tourist an lo lut nasa a, heti lama kan hmalaknate leh kan hmachhawp awmte pawh a thahnem tham hle. Infrastructure leh thil dangah hmalakna hrang hrang awm mah se, a tak taka kan buaipui tur chu mihring an ni a, khualzin an tam zel avangin department chauhin a dawl zawh rual a ni lova, YMA te nen kan tanrual hi a ngai a ni,” a ti a. “Tourism Department hi tunah Department lian lo tak ni mahse potential tha tak kan nei a. Tun atanga kum reilote ah chuan Department lian, sum thawhchhuah lamah pawh a lian zingah a tel thei ngei ang,” a ti bawk.
He hunah hian Tourism Department Commissioner & Secretary Vanlaldina Fanai chuan Central YMA nen thawhhona thuthlung an ziak thei tur chu lawmawm a tih thu sawiin, Tourism lama hmasawn tumna ah Central YMA chu neitu chan chang taka che turin a sawm a. Central YMA President R. Lalngheta pawhin theihtawp an chhuah tur thu a sawiin, YMA leh Tourism Department thawhona chuan rah tha a chhuah ngei a beisei thu a sawi bawk a ni.