Serchhip-ah 'National Space Day 2026' hmangin Zirlaite tan Quiz Competition buatsaih nghal a ni
Serchhip DC Pisapui Hall-a 'National Space Day 2026' puala hun hman ah hian RD&AD Minister Prof. Lalnilawma chuan hetiang hun buatsaih a ni chu lawmawm a tih thu sawiin, tunlai khawvel ah Space Science chu ram hmasawnna innghahna pawimawh tak a nih thu leh Mizoram sawrkar pawhin ruahmanna (plan) a siamna kawng hrang hrangahte pawh Mizoram Remote Sensing Application Centre, Science & Technology (MIRSAC) te data nasa taka hman a nih tawh thu leh hmanraw pawimawh ber ber an nih tawh thu a sawi a. He huna kalkhawm Zirlaite fuihna thu sawiin, “India chu Space Science-a theihna sang tak nei, Thla-a Satellite tumtir thei ram 4-na kan nih mai bakah, Thla chhim lam (Southern polar region-a) tumtir thei hmasa ber kan ni,” a ti a, heng India-in theihna sang tak a neihte hi a hman tangkaina kawng hrang hrangte zir a, Mizoram tana tangkai taka hmang thei turin he huna Science & Technology mite leh zirlai kalkhawmte chu nasa lehzuala ke pen turin a fuih bawk a ni.
.jpeg)
Nimin-a he hun hman hi MIRSAC Member Secretary, F. Lalramchuana chuan kaihruaiin MIRSAC Member Secretary lo ni tawh, K. Lalrammuana chuan khawtlang leh ram tana vansang thiamna (space technology) pawimawhna leh hman tangkai dante a sawi a, ISRO hmunpui Bengaluru atanga lo kal, Dr Renuka Agarwal, Scientist SG pawhin thu a sawi bakah NESAC atanga lo kal, Dr. Rocky Pebam, Scientist SF hnen atangin India hmarchhak State hrang hranga 'National Space Day 2026 hman dan report ngaihthlak a ni bawk.
Kum 2023 August 23-a India-in Thla leilung chhim lama a Thlalem a kahchhuah, Chandrayaan-3 chu hlawhtling takin a tumtirna hriatreng nan India sawrkar chuan August 23 hi 'National Space Day 2026' atan puang a. ISRO bultumin kum 2024 atang khan kumtin August thla tir atangin India ram pumah hman thin a ni a. Mizoram-ah pawh NESAC leh MIRSAC kaihhruaina hnuaiah District hrang hrangah hman thin a ni.
Serchhip-a 'National Space Day 2026' lawmna ah hian chawhma lamah Serchhip khawpui chhunga High School zirlai naupangte tan Quiz Competition buatsaih niin Marian High School chu pakhatna niin Goodwill English Academy chu pahnihna leh Govt. PCR High School chu pathumna an ni a. Hei bakah hian ‘Meet the Scientist’ tih hun hman ni bawkin zirlaite tan Scientist-te kawmna hun buatsaih a ni a; heng bakah hian Audio Visual Show leh Exhibition Display te neih ni bawkin, MIRSAC-in vansang thiamna hmanga Mizoram leh Serchhip District hmun hrang hrang an zirchiannate pholan a ni bawk.