MZP in MPSC-a thawktute Pisa kai tur dangin Vawiin lamah pawh dan chhunzawm an tum

Mizo Zirlai Pawl (MZP) chuan MPSC siamthat hnatlang an neih mek chu nimin thleng khan la chhunzawmin MPSC Chairman leh Secretary bakah Officer leh Staff te pisa kai tur an dang chhunzawm a, Vawiin lamah pawh hian dan chhunzawm an tum thu an sawi.

MZP chuan MPSC Siamthat Hnatlang an kalpui chu nimin thleng khan chhunzawm zelin MPSC-a thawktute Pisa kai tur an dan chu a ni hnihna atan an chhunzawm leh a, MZP chuan an thilphutte tih hlawhthlin a ni hma loh chu tiamchin awm lo a lungawilohna lantir chhunzawn an tum thu an sawi a, Police ten tharum thawhna an lantir leh MPSC Chairman leh Secretary bakah Officer leh staff ten Police tha chakna hmanga zirlai mahni dikna chanvo phut a an pal lui duh chu an dem takzet tih thuchhuah siamin an sawi a ni. 

MZP chuan an thil ngiat -MPSC kalphung siamthat vek an duh thu leh sawrkarin Reform Committee/Commission din an phut thu te, One Time Registration (OTR) chungchang ah OTR hi hman tlak a nih hma chuan tihtawp a, need based specific application form siam ngei nise an duh thu te, OTR felfai loh avanga document upload kimlo te Offline-a document te thehluhna hun siamsak leh Written exam-a tling tawh, OTR felfai loh avanga a document upload kim lo reject tawh te tan offline a document submit na hun siam sak te chu tih hlawhtlin an phut thu an sawi a, Vawiin lam pawh hian a hun leh leh hmun ngaiah MPSC Pisa kai tur hi dan leh tur a ni tih an sawi a ni.

Tarlan tawh angin MPSC chuan niminpiah khan thuchhuah siamin, MZP thilphut zinga mi OTR tih tâwp te, OTR-a document upload kim loh avanga application reject tawh te offline-a document thehluh tir te chu pawm chi ah an ngai lo tih an lo sawi tawh a, OTR tihtâwp chu buaina chinfelna tur ni lovin applicant-te tana buaina thar siamsaktu tûr zawk a nih thu an sawi a, Candidate-te hamthatna te, rintlak a nihna leh a zahawmna humhim chu thil pawimawh berah an ngaih thu tarlangin, hna a kalpui dan tur chu candidate pakhat emaw, Group pakhat emaw tan chauh ni lovin, candidate zawng zawng tan thuhmun, felfai leh dân ang taka kal tur a ni tih chu Commission dinna a ni tih an sawi bawk.

MPSC chuan MZP-in Office kal thei loa an siam avangin MPSC hna lak hrang hrang a Written Examination leh Personal Interview neih turte chu tiamchin awm lovin an sawn hla a, Group ‘C’ Exam hun ruat tawh, MPSC-in question a siamsak pawh tun dinhmunah pekchhuah theih a nih tak loh avangin Department-te question inpekchhuah theih hun ngaichang tura hriattirin, Sawrkar department hrang hrang hna lakna atana MPSC Examination Hall hmang tura lo inpuahchah tawhte pawh a tul anga lo insiamrem turin an hriattir bawk a ni.