Mizoram Film Development Committee thukhawm

Mizoram Film Development Committee chu nimin khan Information & Public Relations, Printing and Stationery changtu Minister B. Lalchhanzova hovin a Pisa-ah an thukhawm.

He thutkhawm ah hian Minister B. Lalchhanzova chuan kum 2026-27 atana Mizoram Film Development Committee (MFDC) member ruatte lawmna thu sawiin, Film leh a buaipuitute chu a rualkhai ang thei bera Committee in an hmasawnna leh film tanzelna tur an ngaihtuah a pawimawh thu a sawi a. Film hmasawnna chungchang sawiin Minister chuan, “Film hma-sawnna tur kan sawi hian a buaipuitute, a mihring thiamna leh an hmasawnna tur pawh ngaihtuah tel a ngai,” a ti a. Concert economy chungchang sawiin, hmasawnna tam tak a thlen theih dante a sawi bawk a. Kawng hrang hranga Mizoram in film lamah kan thanzelna atan CSR leh thil dangte pawh a hman theih em tih Member te chuan lo zir sela a duh thu a sawi a ni.

He hunah hian MFDC Chairman leh IPR P&S Secretary Betsy Zothanpari Sailo chuan MFDC chu nikuma Sawrkarin film hmasawnna ngaihtuah tura a din thu sawiin, hetah hian pawl thawhpui bik emaw awm lovin film buaipuitute leh siamtu zawng zawngte chu an huap vek a ni, a ti a. He thutkhawm ah hian Mizorama Film Industry tihhmasawn nana hmalak dan tur hrang hrang sawiho a nih bakah sum tam zawk film hmasawnna atana dah a pawimawh thute sawilan a ni a. MFF leh I&PR lamin Ailawng-a an din film shoot nana Zokhua siam chu tihchangtlun zel a ngaih thute pawh tarlan a ni bawk.

MFDC-ah hian Minister hi Patron niin Official Member bakah Non-Official member atan Lalsawmliana Pachuau, Napolean R.Z. Thanga, Aldrin Zosangliana, Vanneihtluanga, Dr. Louise Hauhnar, C. Lalhmangaiha (Mapuia Chawngthu), H. Lalsangzela leh H. Rotluanga te ruat an ni.