Kum kalta chhungin Serchhip District-ah nau chunga thi awm lovin hriselna kawngah hmalak mek a ni
Inrinni kalta-a India Independence Day lawmna Serchhip Sports Complex-a neih ah he hun hmanpuitu PWD Minister Vanlalhlana chuan mipuite’n hriselna tha kan neih si loh chuan hmasawnna in awmzia a nei tak tak thei lo tih sawiin, “Mipuite hriselna kawngah Health & Family Welfare Department kaltlangin chak taka hmalak a ni,” a ti a. “Routine Immunization coverage tha tak a neih reng niin, chhinchhiahtlak takin kum kalta chhung khan nau chunga thi an awm lo a ni,” a ti a. District Hospital Serchhip-ah Dialysis Centre thar hawn a nih thu te, Makeshift Hospital building thar hawn a nih thu leh District Hospital leh Serchhip District chhunga PHC 4 ten damdawi In tha tehna- NQAS Certificate an dawn bakah State Level Certificate dawng CHC pakhat kan neih bawk thu a sawi a; Nursing School leh Bio-Chemistry Laboratory te sak that mek niin Medicine Specialist leh Medical Officer thar dah an nih thu a sawi a. Damdawi In-a damlo admit zaa 95% chuang ten MUHCS hamthatna an dawn tawh thu sawiin, “Kum 2025-2026 chhung hian District Hospital-ah hian MUHCS hmang hian damlo 1,163 zet a thlawna enkawl an ni,” a ti.
PWD Minister chuan Women and Child Development kaltlangin nu leh naupang sang telte tan Nutrition programme leh Anganwadi service kalpui reng a nih thu pawh sawiin, naupang harsatna tawkte tan District Child Protection Unit kaltlangin Sponsorship Assistance pek thin niin, him leh hrisel taka an thanlen theih nan hna thawh reng a nih thu a sawi a. Food, Civil Supplies and Consumer Affairs Department kaltlangin Serchhip District-a chhungkaw 18,026 hnenah buhfai regular taka sem a nih thu a sawi bawk.