Hman khat daih plastic khapna bawhzui chho mek

Zonuna Kawlni (LENKAWL) • August 20, 2026 • Comments • Serchhip

Plastic Waste Management Rules, 2026 in Hman khat daih plastic, Singles Use Plastic (SUP) hman a khapna bawhzuiin tunlai hian Serchhip District chhunga sumdawnna hmun hrang hrangah SUP zawrhchhuah a awm leh awm loh enfiah hna kalpui mek a ni.
 Serchhip District Bawrhsap Paul L. Khuma chuan Rule 12 (4) of Plastic Waste Management Rules, 2016 hnuaia Singles Use Plastic hman khapna bawhzui tur hian Inspection Team paruk (6) a siam a, heng Team hrang hrangte hian tunlai hian an huamchhung theuha sumdawnna hmun leh dawr lian te tlawh kualin Hman khat daih Plastic (Singles Use Plastic) hmang leh zuarchhuak an awm leh awm loh enfiah hna hi an kalpui a. August 18, 2026 khan District Urban Development Officer (DUDO) Gaston Vanlalhriatpuia kaihhruai Team te chu Chhiahtlang-ah fehchhuakin nimin khan Addl. DC Dorothy Muansangi kaihhruai ten Serchhip Bazar leh a chhehvel te fangin SDO (Sadar) Rebecca Laldinmawii Hrahsel kaihhruai ten New Serchhip huamchhunga dawr te tlawhin an enfiah bawk a ni.

Heng Inspection Team te hi thla tin ni 20 hmaa an huamchhung ah theuh fehchhuak thin tura tih niin an hmalakna leh thil hmuh dan te thla tin ni 22-ah District Bawrhsap hnena thehlut tura tih an ni a. Inspection Team-ah hian District thuneitute bakah Police, VC leh YMA aiawh te ruat an ni bawk.