Electoral Roll-a inthun thar dil mi 30,652 an awm

Electoral Roll ennawn kal mekah inthun thar dil Mizoram pumah mi 30,652 an awm a, heng mite dilna hi tunlai hian enfiah mek niin hmun tam takah chuan zawhfel a ni tawh bawk.

Election Department-a thawktute sawi danin Electoral Roll Special Intensive Revision neih mekah hian Form 6 hmanga Electoral Roll-a lut/thun thar dil mi 30,652 awmin an zinga 9,169-te dilna chu chinfel (disposed) a ni tawh a, la chinfel loh (pending) 21,483 a awm mek a. Hei bakah hian Form 7 (Electoral Roll atanga paihna) hmangin dilna lut 674 awmin 222 chinfel tawh a ni a, la chinfel loh 452 a awm bawk a. Form 8 (hming siam that, hmun danga insawn, kum siam that etc) hmangin dilna lut 20,870 awm bawkin heng zinga 4,016 chu chinfel a ni tawh a, la chinfel loh 16,844 a awm bawk. Election department thawktute chuan tuna data an neih bakah dilna lut leh chinfel ngai hi khawih mek a nih avangin tuna data an neih pawh hi a la danglam leh thei tih an sawi.

Mizoram khawthlang lama inthun thar dil an tam chungchang zawhna chhangin Election a thawktute chuan thil awm dan uluk taka vil turin District Election Officer (DC)-te hriattir an ni tih an sawi a. Tunhnaia sawi hlawh tak, Mizoram khawthlang lama hearing nei tura kal Official pakhatin zu a rui nia sawi chu Election Commission of India (ECI)-a thlen tawh niin sawn a ni dawn tih an sawi bawk.