Bairabi kawng enfiah

Kolasib Bialtu MLA leh Assembly Deputy Speaker Lalfamkima chuan nimin khan Zero Point atanga Bairabi panna kawngpui thawmthat hna thawh mek chu a hmunah a enfiah a, tun dinhmunah Fur ruahsur a nasat avangin Contractor ten an duh angin hna an thawk thei rih lova, mipuite harsatna sutkian nan kawng chu a 'single lane' chin tal thawmthat phawt nise tiin, a khuar zual laite lunga hnawh khat turin a chah bawk. He kawng siamna atan hian sawrkar chuan cheng nuai 2,752.82 a ruahman a, Tanor Engineering te hnenah cheng vbc. 15.94 a pek niin June 30, 2025 khan hna tanin thla 11 chhunga zo tura tih an ni.