Tourist Lodge, Chaltlang-ah 4-Star aia hniam lo Hotel siam turin Concession Agreement ziah a ni
‘Development of 4-Star or Higher Category Hotel at Tourist Lodge, Chaltlang, Aizawl, Mizoram on Design, Build, Finance, Maintain, Operate, Manage & Transfer (DBFMOMT) Basis’ hnuaia inremna hi Chief Minister’s Office-ah ziah a ni a. State sawrkar aiawhin Tourism Department changtu Commissioner & Secretary Vanlaldina Fanai chuan hming a ziak a, Company aiawhin Prashant Gupta, Chief Financial Officer & Whole-time Director, Hotel Polo Towers Ltd. in hming a ziak a. He hmalakna hi Ministry of DoNER leh Planning & Programme Implementation Department te bultan a ni a, kum 2024 February 19 khan Kolkata-ah Road Show neiin Mizoram sawrkar chuan Tourist Lodge, Chaltlang hi Hotel changtlung zawka siam a nih theih nan PPP Mode-a kalpuina tur ruahmanna a lo siam tawh a. Tihhlawhtlin a nih theih nan Ministry of DoNER hnuaia Invest India ten theihtawpin hma an lak pui a ni.
Aizawl khawpui ah hian 4-Star emaw, a aia chung emaw thlen In tha la awm lovin Mizoram hi India rama State-te zinga hetiang mikhual thlenna tha nei lo State awmchhun hi nia hriat a ni a. Hei vang hian Mizoram sawrkar chuan Chaltlang Tourist Lodge tihchangtlun hi thaa hriain hma a la ta a. Hotel Polo Towers Ltd. nena inremna hi siam mah se a hmunhma hi sawrkar ta a la ni reng dawn a ni. Sorkar duh dana Chaltlang Tourist Lodge tihchangtlunna tur hi Mizoram Public Procurement Rules, 2020 tlawhchhanin, Vanglaini leh The Times of India chanchinbu-ah te Advertisement tihchhuah a nih hnuah May ni 16, 2025 khan State Procurement Portal-ah e-tender tihchhuah a ni a. Hotel Polo Towers Ltd. hi chhangtu awmchhun an ni a. Endikna neih a nih hnuah an chhanna hi engkimah an tling tawk tih hmuh a ni a, agreement hi ziahpui an ni ta a ni.
Inremna ang chuan Hotel Polo Towers Ltd. hian kum 30 chhung atan DBFMOMT basis-in hna an thawk anga, kum 10 dang tum hnih pawhsei theih a ni ang. He Hotel-ah hian pindan 60 (pindan 40 danga tihlen belh theih) tal awm tura tih a ni a, darkar 24 inhawng, Multi-Cuisine Coffee Shop, Ppecialty Restaurant, Lounge leh Executive Health Club (Gym leh Spa facility awmna) te nei ngei tura tih niin 5-Star Hotel-a hlankai theih tura kalpui tur a ni a. Inremna ziah atanga ni 45 chhungin a hmunhma hi Hotel Polo Towers Ltd. hnenah hian hlan tur a ni ang.
Hotel Polo Towers Ltd. hi India hmarchhak-a Hotel Company lian ber an ni a, tunah hian Hotel 9 an enkawl mek a, hmalak mekna Hotel dang 7 neiin chung zingah chuan Meghalaya, Tripura, Nagaland leh Indian Railways-te nena PPP Project an kalpuite pawh a tel a. Tuna Project hmang hian Aizawl-ah khualbuk tha leh changkang zawk, khualzinte tana hmun tha tak a siam dawn a, tualchhung mi tam tak tan eizawnna hna leh revenue tam zawk a siam chhuak dawn a ni.