Phu takin SPAIN an CHAMPION
Ram 48 te inelna FIFA World Cup 2026 hi nizan hmasa khan East Rutherford-a New York New Jersey Stadium, MetLife Stadium-ah Final khelh a ni ta a, Final-ah hian World Champion nilai Argentina leh European Champion nilai Spain te inhmachhawnin a hmunah mipui 80,663 zetin an en a, minute 90 chhung goal inpe lova an inhnehtawk hnuah Spain hian Extra Time-a goal an khung hmangin si khat faiin hnehna an chang a, Argentina laka chungnung taka khel chungin World Cup nomawi an chawi a ni.
Kumin-a FIFA World Cup Final-a inhmachhawn turte hi Football ram lian ber ber te zinga mi ni mah se inkhel hmuhnawm tak erawh a ni lo tih theih a ni a, inkhelh tan phat atangin Spain an chungnung nghal a, Spain hian ball an chang tamin Goal shot pawh an nei chho mawlh mawlh a, Argentina lamin ball an chang tlemin Goal Shot pawh an nei thei lo a, chutihrual erawh chuan Goal shot ngah zawk Spain in goal an khung thei bik chung lo a, minute 90 chhungin Spain hian ball za zela 65 changin Goal shot tum 15 an nei a, goal zawnah tum 9 an pet bawk a, Argentina hian ball za zela 35 neiin Goal shot leh Goal zawna pet tum khat mah an nei lo a, minute 90+3 ah Enzo Fernandez chu Yellow Card pahnih a hmuh avangin hnawhchhuah a ni a, Goal inpe lovin an inhnehtawk a ni.
Hun pangngaia goal khung an awm loh avangin Extra Time khelh zui a ni a, minute 106-na ah Spain tan Ferran Torres chuan goal a rawn khung ta a, hemi hnu hian Argentina hian Goal Shot tum hnih rawn nei ve mah se Goal zawnah erawh pet an nei ta chuang lo a, hun tawp thlenga goal dang a luh tak loh avangin Spain hian si khat fai-a hnehna changin FIFA World Cup 2026 Champion an ni ta a, kum 2010 hnua an Champion lehna hmasa ber a ni bawk.
Tun tum World Cup-ah hian Spain hi phu takin an Champion tih theih a ni a, an match hmasa berah Cape Verde nen goal inpe lovin in-hnehtawk mah se Saudi Arabia si li fai-a hnehin si khat fain Uruguay an hneh leh a. Round of 32-ah Austria chu si thum fai-a hneh lehin Round of 16 ah Portugal chu si khat faiin an hneh leh a, Quarter Final-ah Belgium chu 2-1 a hnehin Semi Final-ah France chu 2-0 in an hneh leh a, Final-ah Argentina hneh lehin an Champion ta a, Spain chakna goal khungtu Ferran Torres chu ‘Man of the Match’ niin Argentina Goalkeeper Emi Martinez chuan tum 11 zet save a nei bawk a ni.