MizoTaxi app-ah sawrkar in hma la zelin Lirthei hmanga eizawng te Court-ah kal an tum

State Transport Authority (STA) chuan MizoTaxi app-a inziaklut lirthei chuan mipui mamawh a phuhruk zawh dawn loh avangin mipui mamawh khawp lirthei a awm theih nan hmalak mek a ni tih an sawi a. Hetihlai hian lirthei hmanga eizawng pawl pathum te chuan tunhnaia hman thar, Mizotaxi Application chu High Court-ah khin an tum thu an sawi thung.

Tunhnaia thuchhuah an siamah STA chuan Mizoram-a mihring phur sumdawnna lirtheia chuang thinte'n sawrkar bituk chuan man (approved rate) dik tak an chawi theih nan MizoTaxi app duan a nih thu leh lirthei neitute leh mipuite'n tangkai taka an hman an beisei thu an tarlang a. Tun dinhmunah MizoTaxi app hnuaia inziaklut chin chu Two Wheeler Taxi 624, Four Wheeler Taxi 235 leh Auto Rickshaw 15 a ni a, hei hian Aizawl khawpui mamawh a phuhru dawn lo niin STA chuan a sawi a ni.

State Transport Authority (STA) chuan MizoTaxi kaltlanga Taxi leh Auto Rickshaw hmang duhte chuan an indaih dawn rih lo tih sawiin, lo hrethiam hram turin mipuite an ngen a, mipui mamawh tur khawp lirthei a awm ngei theih nan arang lamin hmalak mek zel a nih thu sawiin, sawrkar thuawiha MizoTaxi app hnuaia lirthei inziaklut zawng zawng chungah an lawm thu an tarlang bawk.

Hetihlai hian lirthei hmanga eizawng pawl pathum- Mizoram Taxi Association (MTA), Aizawl Two Wheeler Taxi Association (ATTA) leh Aizawl District Auto Rickshaw Owners' Association (ADAROA) intelkhawm chuan tunhnaia hman thar, Mizotaxi Application chu High Court-ah khin an tum thu an sawi thung a. MTA, ATTA leh ADAROA Office Bearer te hi kar kalta Inrinni khan thukhawmin Mizotaxi Application chu High Court-a kalpui turin thutlukna an siam a. Hemi chungchanga zawhna chhangin, ATTA President Lalhmunmawia chuan Mizo Taxi application an hman duh loh chhan hrang hrang zingah rate ennawn hmasak an duh thu te, Registration Fee awm lo se tih te leh app hmangtu mipuiten chhiah zaa 6 an chawi turte a tel tih sawiin, sawrkar hnenah pawh an thlen tawh tih a sawi a. He app chungchang hi an zirchian hnuah Motor Vehicle Rules bawhchiatna engemawzat a awm ni a an hriat bawk avangin a rang thei ang bera High Court kalpui turin thutlukna an siam tih a sawi.

ATTA hruaitu pakhat chuan, “Tuna kan hman mek hi kum 2024 rate a ni a. Hun dangah chuan kum hnih danah te ennawn thin a ni a, hetiang hmalakna lian tham a awm dawn a nih chuan ennawn phawt nise kan duh a. Hei bakah hian Registration Fee Rs. 500 hi awm lo se kan ti a. Chu mai bakah mipui chhiah chawi tur kan hnena lut a, sawrkar hnena chhun leh hi a buaithlak dawn,” a ti bawk.