Mizoram State Human Rights Commission dinin Chaiperson tur leh Member pahnih lakluh an ni
Mizoram State Human Rights Commission (SHRC) din thar a nih hnuah Chairperson hmasa ber atan Justice Marli Vankung, Former Judge, Gauhati High Court leh Member atan mi pahnih- Vanlalenmawia, District Judge (Rtd.) leh K. Lal Nghinglova IAS (Rtd.) te chu nimin khan Mizoram Larsap General (Dr) Vijay Kumar Singh chuan Aizawl-a Lok Bhavan Durbar Hall-ah rinawmna thu tiam tirin a lalut a. Heng mite lakluhna inkhawmah hian Chief Secretary Khilli Ram Meena chuan Larsap-in Mizoram State Human Rights Commission Chairperson leh Member-te a ruatna notification a chhiarchhuak hmasa a. Hemi hnu hian Larsap General (Dr) Vijay Kumar Singh chuan SHRC Chairperson atan Justice Marli Vankung leh Member atan Vanlalenmawia leh K. Lal Nghinglova te chu rinawmna thutiam chham tirin a lalut a. He hunah hian Chief Minister Lalduhoma, Assembly Speaker Lalbiakzama, PWD Minister Vanlalhlana, EF&CC Minister Lalthansanga, Opposition Leader Lalchhandama Ralte, P&E Minister F. Rodingliana, IPRP&S Minister B. Lalchhanzova leh sawm bik mi pawimawh dangte an tel a ni.
Mizoram SHRC Chairperson hmasa ber Justice Marli Vankung hi March ni 4, 1964-ah piangin thiamna lamah B.A. (English Hons.), LL.B. leh M. Phil (International Legal Studies) nei a ni a, kum 1989 khan Mizoram Judicial Service (MJS) a zawm a. October ni 13, 2021 khan Additional Judge, Gauhati High Court-ah hlankai niin, August ni 1, 2023 khan Permanent Judge atan ruat a ni a. March ni 3, 2026 khan superannuation pension-in a chhuak a ni.
SHRC Member tura lakluh Vanlalenmawia hi April ni 1, 1966-ah piangin thiamna lamah B.A., LLB degree nei a ni a. Kum 2011 khan Mizoram Judicial Service (MJS) zawmin March ni 31, 2026 khan Presiding Officer, Motor Accident Claims Tribunal, Aizawl post a chelh laiin superannuation pension-in a chhuak a a ni. SHRC Member tura lakluh K. Lal Nghinglova hi December ni 1, 1956-ah piangin thiamna lamah BA (Hons) a ni a. Kum 1983 khan District Information & Public Relations Officer hna zawmin hemi hnu hian Indian Administrative Service (IAS) zawmin AGMUT Cadre 1996 pek a ni a. Mizoram leh Delhi sawkar hnuaia post pawimawh tak tak a chelh hnuin Principal Secretary to the Government of Mizoram niin November ni 30, 2016 khan superannuation pension-in a chhuak a ni.