Mizoram-a Political party hrang hrang ten dan lova E-Roll a luh tum te dang tura hmalak tha an ti
.jpg)
Mizoram-a Political party hrang hrang aiawhte thutkhawmna, All Political Party Meeting chu nimin khan Aizawl-a New Capital Complex-a Civil Secretariat Conference Hall-ah neih niin he hunah hian Political party tin te chu an aiawh mi pathum theuh tel tura sawm an ni a, he thutkhawm hi Adviser to Chief Minister leh ZPM Vice President, Lalmuanpuia Punte chuan kaihruaiin Special Intensive Revision (SIR), 2026 Draft Roll tlangzarh tâka voter belh leh paih chungchanga hmalak dan turte ngaihtuahin, hmundang-a pem tawh si, Electoral Roll-a la paih loh mi 13,978 an lo awm te leh Electoral Roll-a chuang nawn mi 2,248 an awmte chuan ngaihtuahna a tih thui thu an sawi a; Electoral Roll dik leh felfai tak neih a nih theih nan leh India khua leh tui dik tak chauh Electoral Roll-a an chuàn theihna tura thawktute tawiawm leh lungrual taka hmalakho nise an ti a ni.
Tuna an tih theih ber tura lang chu SIR 2026 Draft Roll lo chhuakta ah khan BLO-ten kum 2005 leh 2025 E-Roll Mapping an tih laia 2025 E-Roll a chuang si, 2005 E-Roll-a zawmpui an neih tir theih loh category-a an dah, ERO-te ruahmanna a hearing neih ngei ngei turah hian Political party te chuan party aiawh tel vek tur leh dik taka tang ngam theuh tura in fuih nise an ti a; NGO-te thu ngaichang chung zela thawhhona tha neia, chung a dan dik chiah lova E-Roll-a luh tumte chu dang vek tura hmalak tha an ti bawk.
Nimin-a thutkhawm-a tarlan a nih danin, kumin-a SIR-ah hian Enumeration Form sem chhuah 8,75,068 a nih laiin Enumeration Form lakkhawm chu 8,28,906 a ni a. Enumeration Form laklet theih loh 46,163 a awm a, chhan hrang hrang avanga Enumeration Form lak theih lohte chu - Boral tawh mi 21,295, Awmna chin hriat loh mi 8,333, Hmun danga pem mi 13,978, E-Roll-a thun tawh mi 2,248 leh chhan dang vanga lak theih loh 309 an awm a ni.