Mizoram-ah School tha tehna siam a nih dawn tih
Nimin khan Aizawl-a School Education Directorate Conference Hall-ah Akhil Bhartiya Shiksha Samagam (ABSS) leh National Education Policy 2020 kum 6 tlin lawmna neih a ni a, he hun hi School Education Minister Dr. Vanlalthlana chuan hmanpuiin sawrkarin zirna siamthatna kawngah School tha tehna siam a nih dawn thu leh School Assessment Board din a nih dawn thu a sawi a, Skill Development-ah MBSE chu Awarding Body an nih theih nan an nawr mek thu te, Zirtirtu Transfer & Posting chu online a kalpui a nih tur thu te a sawi bawk. Hei bakah hian Minister chuan Mizoram sawrkarin Engineering College-a Class neih thuai a nih theih nan hmalak a nih thu leh nakum atanga Class tan tum a nih thu te, NIT Lengpui tih hlawhtlin nan sawrkarin theihtawp a chhuah thu te a sawi a. NIT Lengpui chu NIT dang ai pawha Campus nei tha a nih thu te, Mizoram sawrkarin Forest Clearance atan cheng vbc. 10 an pek thu leh hei hian NIT hotute a tih lawm thu a sawi a, theihtawp chhuah an tum thu a sawi bawk.
He hunah hian Mizoram Education Reforms Committee Working Chairman Prof. Lalbiakdiki Hnamte pawhin NEP tihhlawhtlinna tur kawnga harsatna awm hrang hrangte a sawi a. Kan Exam kalpui dan kalphung siamthat a tul thu te leh zir dan phung siamthat a tul thu te a sawi a. Technology hmanrua chi hrang hrang sawrkarin a sem thin chu hman tangkai a tul thu a sawi a. NEP 2020 rawtna tha tak tak te chu tuna Mizoram zirna kalphung en hian tihhlawhtlin harsa tak tak a awm thu te, School Stage-ah mai bakah College leh University-ah te pawh a tak takah chuan kan zirna ruangam neih mekah tihhlawhtlin mai theih loh te a awm thu a sawi bawk a ni.
NEP 2020 kum 6 cham puala hun hmanah hian Higher & Technical Education Department changtu Commissioner & Secretary Dr. Lalrozama chuan inlawmna thu a sawi a, School Education Director Angela Zothanpuii chuan lawmthu a sawi bawk a. Anni bakah hian Higher & Technical Education Department-a Joint Director Prof. Benjamin Lalrinsanga, SCERT Director Dorothy Zoramthangi, MBSE Secretary Sarah Lalengzami Pachuau leh Samagra Shiksha-a State Project Director C. Lalthanzira te pawhin thu sawiin, Panel Discussion neih zui a ni bawk. He hunah hian Mizoram Education Reforms Committee Member te, School Education Department leh Higher & Technical Education Director leh Officer te, MBSE, SCERT leh Samagra Shiksha-a thawktute leh College leh Higher Secondary School Principal te, Zirtirtu Association hruaitute leh tlawmngai pawl hruaitute an tel a ni.