Mizoram-ah ran 4,675 te insurance tih sak a ni tawh

National Livestock Mission behchhana Animal Husbandry and Veterinary Department leh National Insurance Company (NIC) thawhhona hnuaia Mizoram-a Animal Insurance kalpui mekah ran 4,675 ziahluh a ni tawh a; ran thite tan insurance sum Rs. 20,36,000 pek a ni tawh bawk.

NIC hotute hnen atanga Akashvani News Aizawl thudawn danin, kumin February ni 10-a tlang-zarh tâk Animal Insurance-ah hian tun thla, July ni 3 thleng khan Mizoram District 11 atangin ranvulhtu te'n an ranvulh lai 4,675 chu insurance an tihsak tawh a; ran insure-te hi Aizawl District-ah tam berin ran 2,457-ah insurance tih a ni tawh a, ran 522 insurance tih sakna Hnahthial District-in a dawt a. Lawngtlai District-ah ran insurance tih tawh hi 41 awmin a tlem berna District a ni bawk a. District hrang hrangah ran insure hi a awm a ni. 

Ran insurance hi Vawk, Bawng, Sial, Kèl leh Beram tan tih theih a ni a; tun dinhmunah Vawk hi District tinah insurance tih sak awmin, a vaiin Vawk 4,651 insure tawh a ni a; Aizawl, Lunglei, Serchhip, Mamit leh Saitual District-ah te Bawng 15 insurance tih tawh niin Lunglei District-ah Kel 9 insure tawh a ni bawk.

Ran Insurance hi ran len dan azirin pek tur a ni a; Vawk-ah Rs. 7,200 atanga Rs. 24,000 inkar, Bâwng leh Sial-ah Rs. 14,000 atanga Rs. 48,000 inkar leh Kêl leh Beram-ah Rs. 1,680 atanga Rs. 5,600 inkar pek theih a ni a. Insurance tih tawh rante hi an lo thih palh a, ranvulhtu ten kim taka insurance pawisa dilna atana kim taka lehkha pawimawh thil tel ngaite nen insurance an dil a nih chuan NIC lam hian a rang thei ang bera chingfelin ranvulhtute Bank Account-ah pawisa an pe tur a ni a; NIC hian ni 15 chhunga an chingfel hman lo a nih chuan ranvulhtute hnena sum an pek tur hi 12%-in a pung dawn a ni.