Kumin ah ruahtui tla a tlem

Indian Meteorological Department (IMD) Aizawl in ruahtui tlak dan data a tihchhuah ah Mizoram pumah nikum (2025) aiin kumin (2026)-ah ruahtui a tla tlem zawk.

IMD Aizawl Director Sudheer Kumar Dwivedi sawi danin, Mizoram District hrang hrangah kumin March leh April thla chhung khan ruahtui a tla tam a, a bik takin Aizawl leh Kolasib District-ah ruahtui a tla tam hle a, Lawngtlai, Serchhip leh Mamit-ah te pawh ruahtui a tam hle a. May leh June thla chhung erawh District tam takah ruahtui a tla tlem a, kum 2025-a ruahtui tlak zat nena khaikhinin kumin hian Kolasib, Hnahthial, Champhai leh Siaha-ah ruahtui a tla tlem hle a ni.

Mizoram District hrang hrang zingah Aizawl District-ah June thla khan ruahtui tla tam ber niin 358.6 mm a tla a, Lawngtlai leh Serchhip pawh nikum aiin kumin hian ruahtui a tla tam zawk a. Fur a la nih chho dawn a, ruahtui tlak dan erawh a la danglam thei a ni.

Kumin kum chanve (January - June) chhunga Aizawla ruahtui tla zat chu mm (millimetre) 948.5 niin hei hi nikum kum chanve chhunga ruahtui tla zat aiin a tlem zawk a. Directorate of Science & Technology ten an chhinchhiah danin nikum 2025 kum chanve chhung khan Aizawl-ah ruahtui mm 1206.5 a tlak laiin kumin kum chanve chhunga ruahtui tla zat chu mm 948.5 a ni a, nikum aia kumin chanve chhunga ruahtui tla tlemna hi mm 258 a tling a ni. Nikum January-ah ruah tla a awm lo a, February-ah mm 32.0 tlain, March-ah mm 16.4, April-ah mm 61.8, May-ah 718.3 leh June-ah mm 378.0 a tla. Kumin January-ah ruahtui mm 0.2 a tla a, February-ah ruahtui tla awm lovin March ah mm 223.9, April-ah mm 235.8 May-ah mm 244.6 leh June-ah mm 244.0 a tla.

State Meteorological Centre, Directorate of Science & Technology-in a chhinchhiah tawh chinah Mizoram-ah kum 36 chhung (1986 atanga 2021) khan Fur laiin (June - September) kumtin ruah mm 1,289.9 sur ang a ni.