Kumin ah Mizoram-a Drug License 23 cancel a ni tawh

Kumin kum bul, January ni 1 atanga July 15 thleng khan Mizoram-ah damdawi zawrh phalna (Drug License) 23 chu cancel a ni tawh.

Mizoram-a Damdawi zawrh phalna cancel sak zinga 9 hi damdawi ruihtheih chi hrang hrang - Codeine Syrup, Tramadol, Alprazolam leh Tapentadol leh a dangte kawl leh hralh dan dik loh avanga cancel an ni a, a dangte hi license thu delhkilhte bawhchhiatna avang leh License neitu in a pekkir avanga cancel te an ni. Damdawi ruihtheih kaihhnawiha Cancel 9 te hi Siaha-ah 5, Aizawl-ah 2 leh thingtlang khaw dang ah pahnih te an ni. 

Health & Family Welfare Department hnuaia Food & Drugs Administration (FDA) thuneitute sawi danin kumin hian Drug License cancel sak ni chiah lovin damdawi zawrh phalna licence 137 te chu suspend a ni tawh bawk a. Licence suspend hi chhan chi hrang hrang a awm a. Restricted License damdawi dawr-ah an licence huam phak loh damdawi fimkhurpui ngai tur tam tham deuh zawrh a nihin a tirah zuar zui lo tura hriattir an ni phawt thin a. Thla hnih/thum ral hnua dawr endik leh a niha an dinhmun pangngaia an kawl loh tur lo la kawl chu suspend chhan pakhat a ni.