Hmasawnna atan GST a pawimawh thu tarlang

State Taxation Department Commissioner HK. Lalhawngliana chuan GST hmasawnna chu ramchhung ei leh bar hmasawnna kawnga pawi-mawh tak anih thu a sawi.

Press Information Bureau (PIB), Aizawl chuan nimin khan Aizawl-ah Media Workshop ‘Vartalap’ an buatsaih a. He Workshop-ah hian sawrkar laipui hmalakna hnuaia sum leh pai dinhmun siamthatna leh hnathawh tur siam kawnga hmasawnna tarlanna, ‘12 Years of Governance on Employment Generation and Economic Reforms under GST’ tih thupui hmangin sawiho a ni. He hun hi State Taxation Department Commissioner HK. Lalhawngliana chuan khuallian nia hmanpuiin GST hmasawnna chu ram hmasawnna lungphum pawimawh a nih thu a sawi a. Prime Minister Narendra Modi-a kaihhruaina hnuaiah India chuan ei leh bar kawngah nasa takin hma a sawn a, hna zawngtu ni thin ram kha tunah chuan hna siamsaktu (Job creator) a ni tawh tih a sawi a. Mizoram pawhin GST hmanga ram hmasawnna kawngah hian theihtawp a chhuah a tul thu a tarlang bawk a ni.

Khualzahawm LR. Sailo chuan sawrkar laipui hmalakna avangin media a thang chak hle tih sawiin, Mizoram tualchhung thuthar thehdarhtute hmasawnna chuan mipui hnena thu dik thlen kawngah nasa takin a tanpui tih a sawi a. Khawtlang siamthat nan Media-te chu dik taka hna thawk zel turin a chah a. Khualzahawm Khadi & Village Industries Commission-a Asst. Director J. Zodinpuii pawhin sawrkar laipui hmalakna hnuaia mipuite hamthatna hrang hrang tarlangin, mipuite mamawh thlen turin sawrkar a awm reng tih a sawi bawk.

He Media Workshop-ah hian State Taxation Department leh KVIC atanga mithiam ten Technical Session-ah zirtirna an pe a. He hun hi sawrkar policy leh hmalakna hrang hrangte mipuite hnena awlsam leh dik zawka thlen a nih theihna tura Media-te leh sawrkar inkara thawhhona tha tak siamna tura buatsaih a ni.