Nasha Mukt Bharat Saptah (Drug-Free Week) kharna Inkhawm Serchhip-ah neih a ni
Serchhip SDO (Sadar) Rebecca Laldinmawii Hrahsel kaihhruaia Nasha Mukt Bharat Saptah kharna hun hmanpuitu Addl. DC Dorothy Muansangi chuan Serchhip District-a NMBA hnuaia ruihhlo dona atana hmalakna lo neih tawh dan leh neih mek dante tarlangin, Ruihhlo ngaite pualin Chhanchhuahna Camping neih a nih bakah NMBA hnuaiah hian Hriselna Kutpui te hman a nih tawh thu a sawi a, Ruihhlo do turin mipuite kan tanrual a ngaih thu leh naupang te atanga bul tan a pawimawh thu sawiin, nu leh pa leh zirtirtu ten naupangte hnenah ruihhlo that lohziate inzirtirna uar lehzuala neih a tul thu a sawi a. Mizoram chu khawvela ruihhloa sumdawnna hmunpui (Golden Triangle) bula awm a nih avangin ruihhlo do tura mipuite kan tanrual zel a pawimawh thu a sawi bawk.
He hunah hian Serchhip SP, Gavit Gogna IPS pawhin Serchhip Police Department te chu ruihhlo do turin engtik lai pawha an inrin reng thu sawiin, nikum June 26-a International Day against Drug Abuse & Illicit Trafficking hman leh tun inkarah Serchhip District-ah ruihhlo leh a kaihhnawih ah NDPS Act hnuaiah thubuai 6 ziahluh tawh niin mi 14 man an nih thu a sawi a, Heroin 1.3 Kg leh Ganja 2.9 Kg zet man niin chak taka hmalak zel a nih theih nan Awareness programme leh thawktute intuaitharna Training pawh vawi eng emaw zat neih a nih tawh thu a sawi bawk.
Serchhip-a ‘Nasha Mukt Bharat Saptah’ kharna hunah hian Serchhip District Information & Public Relations Officer (DIPRO) R. Vanneihtluanga chuan he Hapta hman chhunga hmalakna hrang hrangte tarlangin, June 17 atanga 26 thleng awh tur Nasha Mukt Bharat Saptah hi Serchhip-ah chuan June 22 atanga 25 chhung hian ngawrh taka hman niin mipui punkhawmna hmunahte Awareness Campaign, Pledge leh Signature Campaign te neih a ni a, Serchhip District chhunga zirna In hrang hrang 120 chuanga zirlaite hnenah ‘Ruihhlo Zunzam- Drug Awareness Film’ chhuah a ni bawk niin Walkathon neih a nih thu leh Short Yoga and Meditation Session te neiin nimin khan Two Wheeler Rally buatsaih a nih thu te a sawi bawk.
Nimin-a he hun hman ah hian Sawrkar Department hrang hrang aiawhte, MJA leh khawtlang hruaitute telin Election Officer Lalchhanhimi kaihhruaina in Ruihhlo laka fihlim tur leh ruihhlo do na kawnga theihtawp chhuah tura intiamna thutiam chhamrual a ni a. Govt. Serchhip College-a zirlaite tana Slogan inphuahsiak lawmman sem niin Lalrinawma, VI Sem BA chu pakhatna niin C. Lalnunmawii, VI Sem BA leh C. Lalremruatpuia, II Sem BA ten an dawt a ni.