MZP in SIR 2026 kalpui an thlawp thu sawiin, kum 2005-a khaw awm lo khaw thar 97 a awm niin an sawi
MZP General Hqrs. hruaitute hian nimin khan Aizawl Press Club-ah thuthar thehdarhtute kawmin India ram pum huapa Election Commission of India (ECI) in Special Intensive Revision (SIR) a kalpui mek chu India khua leh tui dik takte tana dikna chanvo humhimna leh Electoral Roll dik tak leh thianghlim zawk kalpui tumna a nih avangin an thlawp tlat tih sawiin, Mizoram chhungah pawh SIR hi Mizoram mi leh sa dik takte chauh an awm theihna tura kalpui anih theih nan theihtawp chhuah turin thuneitute an ngen thu an sawi a. Mizoram-ah Special Intensive Revision (SIR) dik leh felfai taka kalpui a nih theihna turin tun hma atanga Foreigner pun chakna thin Constituency thenkhat an enfiah thu sawiin, “SIR in a base 2005 Electoral Roll leh Electoral Roll thar ber, Electoral Roll (2024) atangin danglamna khaikhin a ni a, Chakma khua bikah vote percent punna sang lutuk leh 2005 Elecotral Roll a khaw awm lo, kum 2024-a khaw 97 rawn awm tharte leh India leh Bangladesh khua leh tui nihna nei kawpte MZP in a hmuchhuak a, Electoral Roll-a House number awm lo pawh hmuhchhuah a ni,” an ti a. Hemi chungchangah hian Chief Electoral Officer (CEO) hnenah complaint thehluh a ni dawn tih MZP hruaitute chuan sawiin, “Complaint a tarlan khaw 195 te chu Special Intensive Revision (SIR) kalpui mekah en uluk leh zual turin a ngen nghal a, heng khaw 195-ah hian SIR hi kalpui a nih tawh pawhin, DEO te nen ngei ennawn leh turin MZP chuan a ngen a, he hmalaknaah hian a tul anga thuneitute thawhpui a inhuam reng a ni,” an ti bawk.
MZP hruaituten chuan kum 2005 Electoral Roll-a khaw awm, kum 2024 Electoral Roll thlenga khaw la awm 98-a Voters awm chu 57,103 niin kum 2005-ah hian Voters 43,540 awmin Voters 13563 (31.15%) in a pung tih an sawi a, kum 2005 Electoral Roll-a khaw awm lo, hemi hnu lama khaw ding thar (2024 Electoral Roll thlengin) chu khaw 97 niin Voters 39,428 a awm thu an sawi bawk.
MZP hruaitute chuan ram leh hnam humhimna kawngah hun rei tawh tak atang khan MZP chuan hma a lo lak tawh thu sawiin, “Bangladesh atanga Chakma Foreigner rawn lutte, India khua leh tui nihna pawh nei lo Electoral Roll-a an lut thin leh Electoral Roll-a Chakma Vote pung chak lutuk chu a vei hle a, kum 1995 December thla a Electoral Roll Intensive Revision neih tum pawh khan Electoral Roll Officer leh a hnathawktute enpuiin Mizoram hmun hrang hrangah MZP te chu an lo fehchhuak hial tawh a ni,” an ti a. Chakma foreigners mi sing chuang teh meuh mai Electoral Roll atangin paih an nih thu leh Tlabung Constituency-ah phei chuan voter 4,000 chuang paih an nih thu sawiin, kum 1996-ah Chakma foreigners te Mizoram chhuahsan tura nawr nan ‘Long March’ chu May thla khan Aizawl atanga Chawngte thleng a lo kalpui tawh thu an sawi bawk.
MZP chuan Election Commission of India in Special Intensive Revision (SIR) a kalpui mekah Mizoram-a thawktu Chief Electoral Officer (CEO) leh a thawhpuite chu India khua leh tui dik takte humhimna SIR an kalpuina ah hian dan ang taka hmala tura ngenin, tunhma atanga Chakma Foreigner te avanga Mizoram khua leh tui dik tak ten harsatna an tawk fo thin chu hriatthiam har an tih thu an sawi a. SIR kaltlanga dan lo anga Electoral Roll a awm zawng zawngte chu paih vek turin CEO Mizoram leh a hnuaia hnathawk DEO, ERO leh AERO te chu a ngen a. Booth Level Officer (BLO) te pawh rinawm leh dik taka thawk tur leh khua leh tui ni lo te chu paih ngam turin a ngen tih an sawi bawk.