Minister in 'Project Thaichhawninu' a tlangzarh
Beti Bachao Beti Padhao Flagship hnuaiah Mizoram Postal Division leh Women & Child Development Department tangkawp hmalaknaa tlangzarh tak 'Project Thaichhawninu' hi Mizoram District 11 chhunga RD Block 27, ICDS huamchhung khaw hrang hrangah te kalpui tura ruahman a ni a. He Project hnuaiah hian hmeichhe naupangte chu Post Office leh State Bank of India kaltlangin Account hawnsak theih an ni anga. Anganwadi Worker leh Postal Department a thawktute chuan khaw tinah Awareness leh Account hawn runpui hi an nei dawn a. Ruahman ang chuan Thla 10 chhungin kum 10 hnuai lam hmeichhe naupang 4050 ziahluh hman tum a ni a. Tunah hian Mizoram-ah hmeichhe naupang 18,560-in SSY Account an nei tawhin, kum 10 hnuai lam Projected Population 1,50,000 chuang atanga chhut chuan tan lak a la ngai hle a ni.
Project hming ‘Thaichhawninu’ hi Mizo thawnthu hlun tak pakhat Mauruangi leh Bingtaituki te thawnthu atanga lak a ni a. Mauruangi nu-in rethei tak chung pawha a fanu tana a inpek ang khan tunlai nu leh pa ten Sukanya Samriddhi Account hmangin an fanute hmakhua atan an inpek ve theih nan he project hi duan a ni.
'Project Thaichhawninu' tlangzarhna hun hi Salvation Army Territorial Headquarter, Aizawl-a Booth Mansion Conference Hall-ah neih a ni a, he hunah hian Minister Lalrinpuii chuan Hmeichhe naupangte hamthatna leh Nu leh Pate mawhphurhna pawimawh tak tilang thei 'Project Thaichhawninu' tlangzarh a ni ta chu lawmawm a tih thu sawiin, fanute chu ram leh hnam innghahna an ni tih a sawi a, an hmakhua chu Mizoram hmakhua a nih avangin chumi ngaihtuah chu Nu leh Pate mawhphurhna pawimawh ber pakhat a nih thu a sawi bawk. Minister Lalrinpuii chuan Mizo thawnthu-a Mauruangi nu in a fanu Mauruangi damkhawchhuah nana theitawp a chhuah angin, fa ten hmakhaw eng tak an neih theih nana kaihhruai leh venhim chu Nu leh Pa tinte ko va tla a ni tih a sawi a. Nu leh pa, pi leh pu bakah nau piang thar nei zawng zawng chu kum 10 la tling lo hmeichhe naupangte tan SSY Account chu hawnsak theuh tura chahin, chumi kawngah chuan Kohhran, Tlawmngai pawl, Anganwadi Worker, ASHA, Zirtirtute leh Postal Department-a thawktute chu tanrualpuiah a sawm nghal bawk.
Nimin-a he hun hman hi SW, WC&D-a Commissioner & Secretary Lalzarmawii chuan kaihruaiin Superintendent of Post, Mizoram Division KL. Singh chuan 'Project Thaichhawninu' hi a sawizau bawk a ni.