CM hovin MRMC thutkhawm neih a ni
He thutkhawm ah hian Mizoram-in ama puala High Court a neih theih dan tur sawho niin High Court dinna tur hmun hma a that thu leh sawrkar sum senso a lo tlem phah dawn bakah Mizoram mipuiin an dikna chanvo awlsam zawka an chan theihna tura kawng sialna a ni tih an sawi. MRMC hian Chief Secretary leh Secretariat-a Officer ten Household MR an kawl zat a lo tihtlem sak tawh a, tunah hian Mizoram Police Officer ten Orderly (Ardali) an kawl mi 118 vel pawh hi tihthlem leh tha tiin sum leh pai senso a tlem phah dawn bakah Police Department-a thawktute daihzai zawka semdarhna a ni ang.
Sawrkar kalphung fel leh chak zawk a awm theih nan District Administration chak zawk din pawh MRMC chuan tha tiin DC Office tihchakna atan District tina District Rural Development Office (DRDO) te chu DC Office-a Planning & Development Wing anga zawi zawia lehlin a tul ni ah an ngai a. District tina Deputy Commissioner Office te Manpower tihchak an ngai avangin sawrkar inrenchemna hre reng chungin thuamchak dan tur MRMC, Administrative Reforms Sub-Committee-in lo ngaihtuah se an ti bawk.
Mizoram sawrkar hnuaia thawk Doctor ten an lak mek Non-Practicing Allowance (NPA) pawh ngaihtuah lehin Doctor ten NPA hi dik taka an lak theih nan ‘Monitoring System’ changtlung tak siam an rawt a, Zuangtui Industrial Estate chhunga Industrial plot dawngtuten a nihna ang taka an hman theih dan tur te, Balu leh Lung atanga chhiah lak belh theihna te, sawrkar inrelbawl dan tha zawk neih dan tur leh sum inrenchemna lam thil engemaw zat an sawi bawk.