ZMC & H Governing Body thutkhawm neih a ni

Zoram Medical College & Hospital (ZMC&H) Governing Body chu nimin khan an Chairman leh Chief Minister Lalduhoma hova thukhawmin hmalakna leh hmachhawp hrang hrang an thlirho.

CM Conference Hall-a thutkhawm ah hian Department of Physical Medicine & Rehabilitation, Medical College-a Department awm ngei ngei tura National Medical Commission-in a tihah Doctor pakhat chauh a awm mek a. Ani hian Clinical leh Faculty mawhphurhna lain hei hi a ranglama siamfel nise an ti a. Critical Care Block chu CSR atanga sak mek a ni a. Equipments pawh an nei nghal dawn a. He Critical Care block hi a hman theih huna tangkai taka hman dan tur sawiho a ni.

Zoram Medical College & Hospital chu tihchangtlunna tura proposal, MPLAN lama dahluh tawhte thlirho nghal a ni a. Governing Body hian heng project-te a ngaihpawimawh hmasak dan indawt (priority list) a siam bawk a. Project te hi a ruala thawh nghal vek theih a nih loh thulhah thawh hmasak dan tur indawt hi siam thin a ni.

He huna tarlan a nih danin kum hnih liam ta chhungin ZMC&H-ah hian Cabin thar 30 leh ICU thar 13 te siam a ni tawh a. ICU bik hi chu a hlui han thawmthat te pawh an awm a. Khum (Hospital bed) hman theih loh (Non-Functional) tam tham tak siam that (functional) an ni tawh bawk a. Tunah hian khum 517 neiin Mizo-ram-a Hospital lian ber a ni tawh a ni.

October 2024 khan Post Graduate zirna Seat 10 hawn thar a ni a, mi pakua in an zir mek a. Tunhnai mai khan MBBS Batch pathumna te an zirchhuak fel leh bawk a ni.

Thutkhawm ah hian Governing Body Member zingah H&TE Minister Dr. Vanlalthlana, Health Minister Lalrinpuii, Bialtu MLA Baryl Vanneihsangi leh Member dangte an tel a ni.