Telecom Regulatory Authority of India (TRAI)-in Serchhip-ah ‘Consumer Outreach Programme’ an buatsaih

Telecom Regulatory Authority of India (TRAI) te chuan nimin khan Serchhip-ah Consumer-te nena intawhkhawmna hun ‘Consumer Outreach Programme’ an buatsaih a, he hun hi District Bawrhsap Paul L. Khuma chuan hmanpuiin Telecom Regulation Act hnuaiah Consumer ten dikna chanvo (right) tam tak an neih thu a sawi.

India rama Telecom Service lama thuneitu sang, Telecom Regulatory Authority of India (TRAI)-in Sub-Hqrs. YMA Hall, Serchhip-a ‘Consumer Outreach Programme’ an buatsaih ah hian Serchhip Bawrhsap Paul L. Khuma chuan Mizoram-a a vawi 3-na atan Serchhip-ah hetiang Programme tha leh hlu tak buatsaih a ni thei chu lawmawm a tih thu sawi a. Telecom Regulation Act hnuaiah Consumer ten dikna chanvo (right) tam tak an neih thu sawiin, Serchhip District chu lehkha thiam, India ram District hrang hrang zinga ziak leh chhiar thiam tamna ber an nih angin, Telecom service chungchangah a ni emaw, thil dangah a ni emaw Consumer-te dikna chanvo te hi mipuite’n kan hriat tlan a pawimawh thu a sawi a. Buaina leh harsatna kan nei a nih pawhin ‘dan hnuaiah felfai leh zahawm taka complain nachang hriat a pawimawh’ tih a sawi a. Serchhip District-in Consumer Association chak tak an nei chu lawmawm a tih thu pawh sawiin, he hun hmangtu zawng zawngte chu Consumer-te dikna leh chanvo te hre thar a, tangkai leh hlawk taka hun hmang theuh turin a chah bawk a ni.

He hunaah hian Khual zahawm Serchhip SP Gavit Gogna IPS pawhin tunlai khawvel thiamna sang tawh tak karah Telephone leh Internet hmangtute’n mahni hming leh nihna dik tak hmanga Sim Card neih a pawimawh thu a sawi a, chu chuan Cell/Mobile phone tih bo leh inbumna hrang hrang Cyber Security & Cyber Offensive thleng thin lakah Police te tana hnu chhui a tih awlsam bik thu a sawi bawk.

Serchhip-a ‘Consumer Outreach Programme’ hi TRAI Regional Office, Kolkata-a Advisor Kaushik Mukherjee chuan kaihruaiin Ashim Dutta, Jt. Adviser, TRAI leh Mizoram-a Telecom hotute atangin mipuite hriat tur pawimawh chi hrang hrangte a lem nen sawifiah a nih bakah Serchhip-a SDPO Larinzuali MPS hnen atangin 'Cyber Crime Awareness' neih a ni bawk a, zawhna leh chhanna hun hman ho a ni bawk.

He hunah hian Serchhip District Consumer Association hruaitu te, Sub-Hqrs. YMA leh District MUP hruaitute, Govt. Higher Secondary School Serchhip leh Govt. Serchhip College-a zirlai te, Serchhip District chhunga Telecom Service Provider hrang hrangte bakah tualchhung chanchinbumite an tel a ni.