ZORO in an dem thu sawi

Zo Re-Unification Organisation (ZORO) chuan Myanmar Sawrkar, mipuite thlan Sawrkar inti in May 3, 2026 zing-a Chin Hills, Falam Township chhung Khawpuichhip khua Thlawhtheihna leh Bomb hmanga a beihna ah mi 7 an thi leh mi thahnem takin hliam an tuar chu an dem takzet tih an sawi a. ‘Myanmar democracy sawrkar, mipui thlan a ding ta’ tia chhuang taka an puan chu a hming mai a nihzia leh Sipai thuneihna hnuaia la awmin nunrawng takin a mipuite a la bei chhunzawm ta zel tih lan chiantirtu chiang tak a nih thu an sawi a. He chetna hian UN DRIP article chiang takin a palzutin a kalh nia sawiin, “Hetiang innghaisakna hi ZORO chuan thleng tawh lo turin a duh takzet a, UNO-ah pawh thlen ngei a tum a ni,” an ti.

Zirtawpni khan Myanmar sipaite chuan Thlawhna hmangin Khawpuichhip hi an bei a, Khawpuichhip beihna avang hian Myanmar atang hian Zokhawthar-ah raltlan an luh belh a. Sub-Hqrs. YMA hruaitute sawi danin, raltlan te hi Gate paltlangin mi 30 vel an lut a, Lui kana lut, mi thahnem tak awmin an chin ngaihven mek a ni a. Raltlan hi mi 100 chuang an nih tawh thu Zokhaw-thar khawtlang hruaitute chuan an sawi a ni. Tun tum hi Mizoram ramri hnaia Myanmar sipaite thlawhna hmanga an chet tum thumna niin buaina thleng zui erawh a awm hriat a ni rih lo thung.