SIR 2026-a Enumeration Form thehlut lo te E. Roll thar ah an hming a chuang thei dawn lo

Election Commission of India ruahman anga Special Intensive Revision (SIR) 2026 kalpui mek chungchang ah nimin khan Serchhip District-a Political Party te tan hemi chungchang inhrilhhriatna neih a ni a. Enumeration Form thehlut lo te chu Electoral Roll thar ah hian an hming a chuang thei dawn lo a ni.
Serchhip DC Meeting Hall-a SIR 2026 chungchang inhrilhhriatna hun Political Party te tana buatsaih ah hian ZPM, INC leh MNF hruaitute telin District Election Officer leh Bawrhsap Paul L. Khuma chuan SIR chu Electoral Roll thenfai leh siam that hna Election Commission of India atanga hmalakna kal mek a nih thu a sawi a. Electoral Roll thar siam nana In tina tlawhchhuah (house-to-house visit), Voter-te hming, kum, leh nihnate ziahluh thar hna (enumeration) te chu langtlang tak leh fimkhur taka kalpui tur a nih thu sawiin, Political party aiawh kalkhawmte chu thawhhona tha tak neih puiah a sawm a; Serchhip mipuite pawh Special Intensive Revision kalpui mek hi ram hnuk khawih thil tak meuh a nih avangin lo ngai pawimawh theuh turin a sawm bawk a ni.

Nimin-a he hun hman ah hian Serchhip-a Election Officer Lalchhanhimi chuan Special Intensive Revision (SIR) chungchanga thil pawimawhte sawi zauna leh zirtirna a nei a, tun dinhmunah Serchhip District chu Electoral Roll-a hming thlunzawmna (mapping) kawngah Mizoram-ah a tittha ber niin 91% chuang mapping tih zawh tawh a nih thu a sawi a ni.

Serchhip District-a Special Intensive Revision (SIR) 2026 kalpui mekah hian niminpiah, May 20, 2026 atang khan hmalakna kalpui tan niin May ni 30 atanga June ni 28, 2026 chhungin Serchhip District chhunga Booth Level Officer (BLO) hrang hrangte chuan an huamchhunga In tin tlawh chhuaka Enumeration Form sem leh lakkhawm hnate an thawk tan dawn a, Political party hrang hrang aiawh Booth Level Agent (BLA) ten BLO te hi an tawiawm dawn a ni.

Election Commision of India in ruahmanna a siam dan chuan SIR 2026 atan hian June ni 5, 2026-ah Draft Roll tih chhuah a ni dawn a, siam that ngai leh sawisel duh neite tan August ni 8, 2026 thleng hun hawn a ni anga, September ni 6, 2026-ah Final Electoral Roll tarchhuah a ni ang. Enumeration Form submit lote chu Electoral Roll-ah an hming a chuang ve dawn lo a ni.