Serchhip District-ah Sawhthing hralh zo thawkhat

Mizoram-ah Sawhthing hralhna man a san chhoh zel avangin Serchhip District-ah pawh Secondary Collection Centre (SCC) hrang hrang kaltlangin Sawhthing hralh zawh thawkhat a ni tawh a, khaw thenkhat ah chuan kg-ah Rs. 55 te a ni tawh a ni.
Serchhip DC Office atanga LENKAWL in thu a dawn danin sawrkar in a ruahman dan chuan May thla tawp thleng hian SCC kaltlang hian Sawhthing hi leiin kg-ah Rs. 50 a tlin lohna te chu Support Price pek tur a ni a, amaherawh chu tun dinhmunah Sawhthing man a san chhoh tak avangin SCC hrang hrangte hian Sawhthing hralh tur an nei meuh tawh lo a, hralh tur la awmna Thenzawl SCC-ah chuan kar kalta khan kg-ah Rs. 55-a lei duh an awm avangin hralh zawh thuai theih beisei a ni a, khaw dang ah erawh chuan SCC kaltlang kher lovin Sawhthing neitute hian an hralh thei tawh a, sawrkar tan pawh Support Price pek kher a ngai dawn lo niin a lang a ni.

Sawrkar in SCC kaltlanga Sawhthing hralhna a kalpui ah hian a tir lamah Sawhthing rate hi a tha lo hle a, rate hniam lai berin kg-ah Rs. 19 te niin hemi hnu hian sang leh hretin kg-ah Rs. 23 atanga Rs. 26 te a ni leh a, April 21 khan N. Mualcheng-ah Rs. 50 kaiin May 7 leh 8-ah Rs. 55-ah a kai leh a, Chhingchhip SCC-ah pawh May 12 khan Rs. 53 niin tunah Serchhip District-ah hian Sawhthing hi an hralh zo thawkhat nia an ngaih thu an sawi a ni.