School 51 te dahngheh an nih dan Minister in a sawifiah

School Education Minister Dr. Vanlalthlana chuan May 18, 2026-a Council of Minister thukhawmin School 51 te sawrkar School (provincialised) atana pawm dan sawifiahin, “Heng School-a Zirtirtute hi an qualified em tih endik vek a ni dawn.
He thutlukna avanga kum khata sawrkar sum sen belh tur chu cheng vbc. 10 vel a ni,” a ti. Nimin-a Aizawl Press Club-a thuthar thehdarhtute a kawmna Education Minister Dr. Vanlalthlana chuan dinhmun sang zawka School hlankai (upgradation of Schools) chungchanga Memorandum lut chu September 27, 2023-a Council of Minister thukhawm chuan an pawm tawh thu sawiin, “Provincialistion atan School 180, Provisional Adhoc atan School 52 leh Lumpsum Grant in Aid atan School 108, a vaiin School 340 pawm a ni. September 27, 2023-a Council of Minister thutlukna siam hi DPAR, Law & Judicial leh Finance Department-in an hriatpui lo,”a ti a, sawrkar hna nghet lak turah chuan Department pathum hian an hriatpui ngei ngei a ngaih thu a sawi a ni.

June 18, 2024-a Council of Minister thukhawm chuan September 27, 2023-a Council of Minister thutlukna hi a hnawl tih sawiin Minister chuan, “Hnawl a nih chhan chu - Provisional Adhoc Rules siam a nih loh vang te, September 22, 2023 leh September 29, 2023-a dinhmun sanga dahna atana tehfung (criteria) pha lo tam tak an awm avang te, Govt. of Mizoram (Transaction of Business) Rules, 2014 in a sawi angin Council of Minister-in Group A (Level 10) hlawh la thei tur a ngaihtuah dawna DPAR hriatpuina a awm a ngaih avang te, mimal School din an tel nia hriat a nih vangte leh mahni School hminga HSLC Exam hmachhawn thei lo an awm vangte a ni,” a ti.

Education Minister chuan October 16, 2024-a Council of Minister thukhawm chuan a hmain ngaihnathiamna (relaxation) dah tel a nih loh avangin relaxation clause an dah tel thu sawiin, “May 13, 2025-a Council of Minister thukhawm chuan felfai zawka Grant-in-Aid School-te kalpui a nih theihna atan DPAR Minister kaihhruaina hnuaiah Study Team din a ni, anni hian The Mizoram Education (Lumpsum Grant-in-Aid for General Maintenance of Private School), Rules, 2025 an siam a ni,” tiin Rules siam thar hi February 4, 2026-a Council of Minister thukhawmin an pawm thu a sawi a. Rules thar behchhan hian Council of Minister chuan School 51 te chu dahngheh tura a pawm tak thu sawiin, “Heng School te hi kum 2023-a notification hmanga criteria pha te an ni. Special Blind School, Durtlang chiah criteria pha lo awmchhun an ni. Kum 2023 criteria pha lo pawh kum 4 chhunga enrollment chawhrual kum 2025 enrollment atanga 2026 enrollment atanga criteria an rawn phak chuan provincialised tur zingah telh an ni. Kum 2023-a criteria pha si, kum 2026-a enrollment hniam nasa lutukte chu Schoolah kal chilhin, endik a ni ang,” a ti bawk.

Sawrkar School-a hlankai thar an awm avang hian sawrkarin kum khata sum a sen belh tur chu cheng vbc. 10 vel a nih tur thu Minister chuan sawiin, “A tira School 47 turin kan hisap a, chu chu cheng vbc. 9.7 vel a ni. Heng School te tan hian a hmain sawrkarin kum khatah cheng vbc. 43.60 a seng a, a sen belh tur cheng vbc. 10 vel nen khum khatah cheng vbc. 53 bawr vel sen a ngai dawn,” a ti a, term hmasaa ruahmanna siam a nih angin criteria-a tling lo School te pawh dinhmun sangah dah vek nise chuan sawrkar sen belh tur a san hle tur thu a sawi a ni. Heng School a zirtirtute chu an qualified ngei em tih enfiah vek a nih dawn thu pawh sawiin, “Qualified vek tura ngaih an ni a, qualified lo lak an lo awm a nih chuan dahngheh theih an ni dawn lo. HSSLC Zirtirtute phei chu Group A an nih angin MPSC-in an endik vek ang,” a ti bawk.