MZP in Chief Minister chu dawt sawi-ah puhin Vawiin-ah Tourism Pisa kai tur dan an tum
MZP General Hqrs. hruaitute hian Inrinni khan an President C. Lalremruata hovin Aizawl Press Club-ah thuthar thehdarhtute kawmin Mizoram sawrkarin Tourism Director hna chelh tura sawrkar hna atanga pension tawh R. Lalrodingi a ruat nawn chu tha lo an tih thu leh sut leh ngei tura Mizoram sawrkar an ngen thu an sawi a. Sawrkar hna atanga a pension hnua sawrkar-in Officer on Special Duty (OSD) to the Chief Minister atana a ruat R. Lalrodingi chu a hna pangngai bakah Tourism Director hna chelh tel tura ruatna Order sawrkarin a tichhuak chu mak an tih thu sawiin, sawrkarin mi pakhat duhsak bik a nei chu pawi an tih thu leh he Order hi sut leh ngei tura sawrkar an ngen thu MZP President chuan a sawi a. Tun thla ni 13 khan MZP hruaituten Chief Minister Lalduhoma chu hemi chungchangah hian an kawm tih sawiin, Tourism Director atana pension tawh rawih nawn an duh loh thu an hrilh thu leh Chief Minister chuan ngaihtuah nawn leh a nih tur thu ziakin MZP-te a pek thu a sawi a ni.
MZP President chuan sawrkar hnathawk pension tawhte rawih nawn dan hrang hrang - Adviser, Consultant leh OSD-te chu an sawisel loh thu a sawi rualin, Department pakhat Director tura mi pakhat duhsak bik a ni chu tha lo an tih thu leh an dodal tlat dawn thu a sawi a ni.
MZP General Hqrs. hian Inrinni tlai dar 5:00 khan thutkhawm hmanhmawh nei nghalin DP&AR (Civil Service Wing)-in thuchhuah siama Tourism Director mawhphurhna la tura R. Lalrodingi ruat a ni chu Mizoram mipuite leh zirlaite zahlohna ah an ngai tih sawiin, he thuchhuah hi sut a nih hma chuan na takin dodal zel nise an ti a, “Hemi chungchang hmalakna kal zelah hian May 25, 2026 (Thawhtanni) hian Mizoram Tourism Pisa kai tur dan a rel a ni,” an ti a. He an hmalakna turah hian mipuite thlawpna ngenin, Pisa kai tur danna ah hian thalai hna zawng mek leh zirlaite tawiawmna turin an ngen nghal bawk a ni.
Comments
Post a Comment
I ngaihdan i sawi hian mipui ngaihdan i tarlang a ni!