Formosa Foundation ten Branch YMA te hnenah Oxygen Concentrator an semchhuak

Formosa Foundation chuan Inrinni khan Central YMA kaltlangin Branch YMA leh tlawmngai pawl dang te hnenah Oxygen Concentrator 500 an semchhuak a, hemi puala hun hman hi Chief Minister Lalduhoma chuan a hmanpui a ni.
Aizawl Vanapa Hall-a Oxygen Concentrator hlanna hunah hian Chief Minister Lalduhoma chuan Formosa Foundation hian kan ram leh mipuite tan thahnemngai takin hma an lo la tawh thîn tih sawiin, Malsawmna thlentu an nih fo thin thu leh tuna heng thil an semchhuak leh chu lawmawm a tih thu a sawi a. “Tlem lai khan Central YMA nena tangkawpin Group YMA 13 te hnenah Ambulance an pe a, MTP leh YLA Sub-Hqrs. pakhat ve ve an pe a. Central YMA hnenah vek hian rikrum thila kan mamawh Puan In 500 leh Choka mamawh set 190 a lo pe tawh a. Ruihhlo dona atan YMA Sub-Hqrs. pakua te chu Bolero Camper a pe a. School pahnih hnenah Bus a pe a, hnuchham In-ah te, damdawi Inah te, Kohhran-ah te thilpek an pe hnem tawh hle. COVID-19 hripui len laia an hnathawhte phei kha chu a tam tham hle a, kan tangkaipui em em a ni,” a ti a. He hunah tel Assam Rifles DG leh Assam Rifles ten Mizoram tana hna an thawhna kawngah te, tun tuma semchhuah Oxygen Concentrator phurh kualna lama an lo tanpui avangte in lawmthu a sawi bawk.

Oxygen Concentrator semna inkhawm hi Central YMA Vice President Prof. Lalnuntluanga chuan kaihruaiin he huna Khual Zahawm Assam Rifles DG, Lt. Gen. Vikas Lakhera pawhin Oxygen Concentrator hlut zia chu an chhungkua pawhin an lo hriat tawh thu sawiin, “Heng concentrator, Vawiin-a semchhuahte pawh hi a mamawhtute tan a hlu dawn tih ka hria a. Mipuite ban phaka hetianga min petu Formosa Foundation te chungah lawmthu ka sawi a ni,” a ti a. Formosa Foundation-a Chairman Jonathan Lalremruata pawhin Formosa Foundation chu tanpui ngaite tana ding, Mizoramin a mamawh an tih ve theih apiang ti thin a ni tih sawiin, Oxygen Concentrator pawh hi damloten tangkai takin lo hmang se an duh thu a sawi a. “Sawrkar leh kan NGO te nena kan ram tana thawhho zel hi kan duh a ni,” a ti bawk a. Anni bakah hian Central YMA President R. Lalngheta chuan thu sawiin, Central YMA General Secretary Prof. Malsawmliana chuan Report a pe bawk a ni.

Tun tuma Oxygen Concentrator 500 te hi Mizoram chhung leh Assam, Tripura, Manipur- a YMA Branch thlanchhuahte bakah YLA leh MTP Branch thenkhatten a hmunah hian an dawng nghal a. Zuangtui Branch YMA chuan an dawn tur hi Tripura Behliangchhip Branch te an kian a. Sub-Hqrs. YMA Serchhip atangin Branch 29 in an dawng a, an zinga Branch 6 te chu Serchhip Town chhunga awm an ni.