Faina Puitu mobile application tlangzarh a ni

PHE Department changtu Minister Prof. Lalnilawma chuan nimin khan ‘Faina Puitu mobile application’ a tlangzarh.

PHE E-in-C Meeting Hall-a he application tlangzarhna hunah hian PHE Minister chuan Faina Puitu application tlangzarh theih a ni ta chu lawmawm a tih thu sawiin, “Mizo-ram pawhin khawvel hmasawn rualin ke kan pen ve zel a, hun leh tha save-na tha tak a ni,” a ti a. “Bawlhlawh hi tangkai taka hman theih dan a awm a, zirbing mite chuan waste to wealth (Bawlh-hlawh atanga rohlu siam) tiin an sawi bawk,” a ti. PHE Minister chuan Supreme Court thuchhuah siam, Solid Waste Management Rules, 2026 dik taka hman a nih theih nan Aizawl pawnah chuan VC-te nen bawlhlawh sawngbawl lamah hmalak an tum thu a sawi a, chung atan chuan he application hi a tangkai a rin thu a sawi a. He application hi win-win solution (Mi zawng zawng tana hlawkna) a nih thu sawiin, mipuite chu a hman dan zirtir dan zawn a tul thu a sawi bawk.

Nimin-a Minister in a tlangzarh tak ‘Faina Puitu mobile application’ hmang hian mahni Sanitation Point-a bawlhlawh paih motor thlen chin hriat theihna te, bawlhlawh paih tur bik hriat theihna te, lungawi lohna thlenna te, mahni In atanga bawlhlawh paih theihna (Door to Door Pickup) a awm a. Bawlhlawh re-cycle theih hralhna (Garbage Store) te, bawlhlawh paih kawnga dan leh hrai (Rules and Regulations) chhiar theihna te leh mipui tana hriattur pawimawh en theihna te pawh he application ah hian a awm bawk. FAINA PUITU hi Android leh Mac-ah download theih niin, kumin chhung (2026) atan man chawi loa hman theih niin, nakum (2027) atangin thla tin Rs. 10 chawi a ngai tawh dawn a. Tunah hian Aibawk RD Block-ah hman a nih tawh a, Aizawl Municipality huam chhungah erawh hman a la ni lo thung.