Tourism Minister in East Tuipui Bial a tlawh mek

Tourism Minister Lalnghinglova Hmar chuan nimin khan Vangchhia-a Lal Mual-a PRASHAD Scheme hnuaia sak tur Development of Basic Amenities lungphum a phum a, Development of Basic Amenities hi PRASHAD Scheme hnuaia Project niin Vangchhia Cultural & Heritage Centre tia hming vuahin cheng nuai 547.32 senga sak tur a ni.

Lungphum phumna hunah hian Tourism Minister chuan Vangchhia khua chu engdang mahin pawlh dal lo tura a duh thu sawiin, khualzin tu pawh lo kal sela, danglam vak tum lovin an nihna sa angin lo dawngsawng tawp turin a chah a. Khualzin te'n Mizorama tlawh an duhte chu siamchawp ni lovin a awmsa en an duh tthin tih sawiin, Vangchhia pawhin Mizo te tana hmun pawimawh siam-chawp ni lo an neih mek chu tihlar zel kawngah Tourism Department chuan theihtawp a chhuah tur thu a sawi bawk.

Tourism Minister Lalnghinglova Hmar hian nimin vek khan Khawbung-ah ‘International Seminar on Mizo Hlakungpui Mual Thawh Rukna, 2026’ chu khuallian niin a hmanpui bawk a, Khaw-bung khua chu mahni inchawimawi thiam tak leh khaw inlungrual an nih thu leh khaw entawn tlak tak an nih thu sawiin, “Khawi hmunah pawh awm ila mahni chawrchhuahna hre reng te an hming-mawi thin,” a ti a. Cheng nuai 25 sengin Khawbung Volleyball Court an siam tur thu tarlangin, Mizo Hlakungpui Mual Seminar puala buatsaih Souvenir ‘Zo Tui’ tih lehkhabu a tlangzarh a. Mizo Hlakungpui Mual a tlawh nghal bawk.

He hunah hian Mizo Hlakungpui Mual a seng luhte thu leh hla zirho a ni a. Kum 1986 khan a thawh khatna neih niin, kum 1996 khan a thawh hnihna neih leh a ni a, kum 2006 khan a thawh thumna neiin kum 2011-ah a thawh li na leh kum 2016 khan a thawh ngana neih a ni a, kumin hian a thawh 6-na atan neih leh a ni.