Sawrkar leh HPC (D) in inremna an ziak dawn

Mizoram sawrkar leh Hmar People’s Convention (Democratic) HPC (D) te chuan April ni 14, 2026 hian Sakawrdai-ah inremna an ziak dawn.

Home Department hnen atanga thudawn danin Mizoram sawrkar leh Lalhmingthanga Sanate kaihhruai pawl Hmar People’s Convention (Democratic) te chuan April ni 14 khian Sakawrdai-ah inremna an ziak dawn a, he inremna ziah hunah hian Adviser to Chief Minister (Political) Lalmuanpuia Punte pawh a tel dawn a, Sawrkar hotute sawi danin Inremna ah hian Mizoram sawrkar aiawhin Home Secretary in a hming a ziak ang a, HPC (D) aiawhin an President Lalhmingthanga Sanate chuan a hming a ziak bawk ang.

Sawrkar hotute sawi danin Hmar People’s Convention (Democratic) mi 43 te chu April thla chhunga an lo kir theih na turin ruahmanna siam a ni a, heng mi 43 te hian thuneitute hma ah an ralthuam an tun hunah an lo lut dawn a. Mizoram sawrkar leh HPC(D) inremna tura inbiakna hi tunhnaiah khan neih a ni a, hetah hian Adviser to CM Lalmuanpuia Punte leh Mizoram sawrkar bakah HPC(D) te inbia in April ni 14 ah inremna ziah an remti ta a ni.

Thudawn danin inremna ah hian HPC (D) hian a hranpa a phut an neilo a, amaherawhchu Sinlung Hills Council huamchhunga khaw hrang hrang inkalpawhna tha zawk neih an duh thu an sawi a, heng bakah hian HPC (D) mi leh sa te intunnunna tur sumfai pe tura inrem niin Sawrkar laipui-a Ministry of Home Affairs nen ngaihtuah tlan tura ruahman a ni.