Sangha thianghlim zawk lakluh theih dan tur sawiho

Mizoram sawrkar-a Fisheries Departments leh Food & Drugs Administration te chuan nimin khan Sangha thianghlim zawk lakluh leh zawrh chhuah chungchang an sawiho.

Fisheries Department Secretary, Er Lalrothanga hova a Pisa-a he sawihona hunah hian Mizoram in Sangha kan kham khawp kan la tharchhuah theih loh thu leh engemawzat phai atangin lakluh a la ngai tih tarlan niin, Fisheries Department chhinchhiah danin kum khatah quintal 11808 vel lalut ang kan nih thu tarlan a ni a. Mizoram in Sangha a tharchhuah tamna Kolasib leh Mamit District ami te chu State dangah a tam zawk hralhchhuah thin a nih thu leh kan Sangha mamawh tam zawk hi phai atanga lakluh thin a nih thu Er. Lalrothanga chuan sawiin, Mizoram-a Sangha tharchhuah te Mizoram chhung ngeia hralhchhuak thei tura a zuartute pawh hmalak pui a ngaih thu a sawi a. Heng kan Sangha ei te pawnlam atanga lakluh leh Mizorama thar ngeite pawh hi a thianghlim tawk em tih enfiah a tul thu sawiin, Sangha hi Fisheries Department enkawl a a nih laiin hmundang atanga lakluh leh a thianghlim leh thianghlim loh endik ah erawh chuan thuneihna an neih loh thu a sawi a ni.

He hunah hian Food & Drugs Administration atangin Designated Officer (Food Safety) Lalrinkimi Pachuau chuan State dang atanga Sangha lo lut endikna an lo neih tawh dan tarlangin, thawktu leh sum indaihlohna avangin regular taka endikna an kalpui theih loh thu a sawi bawk.

Kalkhawmte chuan Mizoram Sangha tharte State pawna thawnchhuak lova mipuite hnena lei theiha siam chu tul tiin, a bak mamawh State dang atanga lakluh tur pawh a thianghlim thei ang ber lakluh anih theih nana hmalak ho dan turte an rel a. Food & Drugs Administration lamin Standard Operating procedure pawh lo duang se an ti bawk.