Chhiarpui neih mekah Mizoram Larsap a inziaklut

India ram Chhiarpui 2027 neih chhoh mek ah Mizoram pum a Houselisting and Housing kalpui tura inziahluh bultanna chu nimin khan Mizoram Larsap, General (Dr) Vijay Kumar Singh hovin Aizawl-a Lok Bhavan-ah neih a ni a, hemi hnu hian Mizoram-ah Houselisting and Housing Chhiarpui kalpui tan a ni.

Hemi puala hun hman ah hian Larsap General (Dr) Vijay Kumar Singh chuan Chhiarpui buaipuitute chu hmaih awm lo tura theihtawp chhuah tura chahin, hriatthiam loh neite pawh tha taka hrilhfiah zel a, India ram chhiarpuia inziaklut vek thei tura tan la turin a chah a. A vawi khat nana Digital Census kalpui a ni chu phurawm a tih thu sawiin, a hlawhtlin ngei theih nan mipuite pawh chhiarpui buaipuitute tha taka lo tawiawm turin a chah bawk.

Mizoram-a Houselisting and Housing bultannaah hian Larsap hi Directorate of Census Operations atangin Joseph H. Lalramsanga, Municipal Commissioner cum Principal Census Officer leh Irene Zohlimpuii Chongthu, Addl. Secretary, GAD & Addl. State Nodal Officer bakah Official dangte'n tawiawmin Lok Bhavan atana Enumerator ruat H. Lalremruati chuan Larsap-in April ni 7, 2026-a Self Enumeration a lo tih tawh atanga Self Enumeration ID (SE ID) a dawn hmangin tul angte a tifel a ni.

Chhiarpui 2027 hi India rama Digital Census hmasa ber tur niin, thawh hniha kalpui tur a ni a. Thawh khatna Houselisting and Housing hi April 1, 2026 atang khan kalpui tan a ni a. Thawh hnihna, Population Enumeration hi February 2027-ah neih tan tur a ni thung ang. A thawh khatna hnuaiah hian April 1, 2026 atanga April 15, 2026 chhung khan mahni inziahluhna, Self-Enumeration neih a lo ni tawh a, nimin April 16, 2026 atanga May 15, 2026 thleng khian Houselisting and Housing kalpui a ni ang.