Mizoram tungding tur chuan Village Council atanga bultan a ngaih thu RD&AD Minister in a sawi

Rural Development & Administration Department (RD&AD) Minister Prof. Lalnilawma chuan Mizoram tungding tur chuan Village Council atanga bultan a ngaih thu a sawi.

Nimin khan Khawzawl-a District Panchayati Resource Centre (DPRC) Office leh Hostel Building te chu RD&AD Minister hian hawngin Khawzawl District chhunga Village Council hruaitu palite hnenah Computer hlanin, VC Dan Bu a tlangzarh nghal a, hemi puala hun hman ah hian Minister Prof. Lalnilawma chuan Mizoram tungding tur chuan Village Council atanga bultan a ngaih thu sawiin, VC-te chu an hmazawn theuha theihtawp chhuah zel turin a fuih a. VC-te thiamna leh theihna tihchakna tura training an neihna tur DPRC Office leh Hostel building tha tak hawn theiha a awm chu lawmawm a tih thu sawiin, DPRC chu tangkai thei ang bera hmang tura duhsakna hlanin, khawtlang leh Department hrang hrangte pawh phal taka hman tir turin a chah bawk.

RD&AD Minister chuan VC-te an inthuam chak theih nan leh khawtlang tan tha zawka hna an thawh theih nan VC Act thar, The Mizoram (Village Councils) Act, 2025 siam a nih thu a sawi bawk a. 15th Finance Commission hnuaia LAD tana Fund kum thum (3) chhung an dawn loh pawh kum khat (1) chhungin an nawrchhuah tawh thu tarlangin, LAD, Directorate of Local Fund Audit leh PHE-te inkara thawhhona a that vang a nih thu a sawi a. 16th Finance Commission chuan VC-ten an mamawh inphuhruk thei tura mahnia sum an hailuh theih (Own Source of Revenue) a ngaihpawimawh thu sawiin, VC hruaitute chu chutiang tura ngaihtuahna seng turin a chah nghal bawk a ni.

He hunah hian Khawzawl Bawrhsap K. Vanlalthiana chuan Khawzawl District-in DPRC Building leh Hostel tha tak an nei ta chu lawmawm a tih thu sawiin, Khawzawl mipuite chuan District-in hma a sawn zel theih nan sawrkarah rinna an nghah tlat thu a sawi a. LAD Executive Engineer LT. Lalrinmawia hnen atangin Technical Report nghaihthlak niin LAD Director Dr. Lalngura Tlau chuan lawmthu sawiin hun a khar a ni.

Nimin-a hawn tak DPRC Office Building leh Hostel Building sakna tur hian Ministry of Panchayati Raj (MOPR) RGSA atangin cheng nuai 100 ve ve dawn a ni a. Tender chhuah niin, Building pahnih sa turin Zothan Consultancy Service, Luangmual, Aizawl thlan an ni a. Office building-ah hian Conference Room 1, Office Room 3, Meeting Hall pakhat leh Toilet 6 a awm a. Hostel Building-ah hian Room 6, Choka 1 leh Toilet 7 a awm bawk a. RGSA Scheme hnuaiah hian VC engemaw zat hnenah Computer hlan ni tawhin pekchhuah tur a la awm bawk a ni.