Mizo Sports Hall of Fame

Champhai District Bungzung khuaa ‘Mizo Sports Hall of Fame’ siam thar chu niminpiah khan Sports & Youth Services Minister Lalnghinglova Hmar chuan a hawng.

Minister in a hawn tak ‘Mizo Sports Hall of Fame’ ah hian infiammi pasarih (7) - K. Kawla (L), Jeje Lalpekhlua, S. Malsawm-tluanga, Lalremsiami Hmar, Lalremsanga, T. Zoramthanga (L) leh Jeremy Lalrinnunga te lim dah a ni a. A hawnna hunah hian Sports Minister chuan Tourism Department hian Champhai lam an hawi thu a sawi a, Mizo thil hlui zawng zawng tih theih chu Champhai-ah a awm thu sawiin, tuna an hawn tak Mizo Sports Hall of Fame pawh hi khualzin tam tak en luai luai a la nih tur thu a sawi a, khualzin lian tak tak te Meeting neihpui theihna tur Mizoram-ah a la awm loh avangin buatsaih tura hma lak a nih dan tarlangin, a hmun atan Champhai an thlan thu a tarlang tel bawk.

He hunah hian khual zahawm leh Bialtu MLA Ramthanmawia pawhin Mizo Sports Hall of Fame hawn a nih theihna tura Bungzung khaw-tlang thawhhona leh an thawhrimna ropui a tih thu sawiin, Mizoram tihmingthatute chawimawina ropui tak an buatsaih chu chhuanawm a tih thu a sawi a, an Bialtu MLA takngial pawh hrilh hre duh lova anmahni senso-a an din ngam chu lawmawm a tih thu a sawi a, khawtin leh vengtin te entawn atan a duh thu a sawi a. Khawtlang enkawlna kawngah sawrkar pawisa rin tum tlatna chu kalsan a hun tawh thu sawuub, theihtawp an chhuah tawh hnua lo puih ve chu MLA te tan pawh a phurawm tawh thin tih sawiin, bul pawh tan hmaa puihna in dil nghal ngawt hi sim a hun tih a sawi bawk.

He hun hi Mizo Sports Hall of Fame Chairman leh Bungzung VCP Goldena chuan kaihruaiin Secretary J. Zakhuma chuan Report a pek bakah Asst. Secretary T. Lalchhuanawma chuan infiammi an chawimawi te chanchin a sawi a, Jeje Lalpekhlua bakah S. Malsawmtluanga te pawhin thu an sawi a ni.