Mizo Hlakungpui Mual thawh rukna leh Ruby Jubilee lawmna neiin mi 6 sengluh belh an ni

Mizo Hlakungpui Mual thawh rukna leh Ruby Jubilee lawmna chu nimin khan neih niin hla phuahthiam mi pahnih leh thuziakmi pali chawimawina lungphun hawnna neih nghal a ni bawk.
Nimin-a he hun hman hi Minister Prof. Lalnilawma chuan khuallian nia hmanpuiin Mizo Hlakungpui Mual buatsaih a nih theihna tura ngaihtuahna sengtute fakawm a tih thu sawiin, Mizo Hlakungpui Mual-a seng luh thar mi 6 te chu a lawmpui thu leh zahna chibai a buk thu a sawi a, mi hlawhtlingte lawmpui a, chawimawi tlakte chawimawi zel turin kalkhawm mipuite a sawm a ni. Khuallian chuan Mizo Hlakungpui Mual hi hmun hrang hranga Mizo awmte min phuarkhawmtu ni se a duh thu sawiin, Hlakungpui Mual atang hian Mizo te harh thar a, zirna ngaisang thar tur leh thalaite'n tlawmngaihna leh hawihhawmna nun vawng nung turin a chah a, Mizo Hlakungpui Mual hi Mizote hlut a nih zel a, Mizo History zir a nih apianga thailan a nih zel theihna turin duhsakna a hlan bawk.

He hun hi Bialtu MLA Ramthanmawia pawhin Khual zahawm nia hmanpuiin Mizoram hmun hrang hrang atanga helai hmun pankhawm a nih hian Mizo Hlakungpui Mual hlutna a lantir thu a sawi a, sum leh thil hlu danga lei theih loh a nih thu pawh sawiin, thangthar lo kal leh zel turah pawh a hlutna a pun deuh deuh a beisei thu a sawi bawk.

Champhai District chhung Khawbung khuaa ‘Hla Kungpui Mual’ hi kum 1986 khan Mizo hlaphuah thiam Patea leh Damhauva te hriatrengna lung phun a bultan niin, kum 10 dan zelah thu leh hla lama thawhhlawk boral tawh zinga thlanchhuah bikte chu a ni bi kima an thih ni atanga kum 5 tling chinte sengluh thin an ni a. Hla Kungpui Mual-ah hian thu ziak mi 15 leh hla phuah thiam mi 21 hriatrengna lung phun a ni tawh a; kumin ah hian Mizo zinga thu ziak mi pali - Capt. LZ Sailo (1924-2008), Pi Kawlkungi (1927-2015), Rev. Zairema (1917-2008) leh Pu Lalhmingliana Saiawi (1937-2016) bakah hla phuah thiam pahnih - Pu Hrawva (1893-1956) leh Pu Lalmama (1901-1959) chu Hla Kungpui Mual-ah hian seng luh an ni leh a, heti hian Mizo Hlakungpui Mual-ah hian mi 42 sengluh an ni ta a ni.

Hla Kungpui Mual hi puitling tan luh man Rs. 20 a ni a; kum kalta 2025 chhung khan Hla Kungpui Mual hian tlawhtu mi 6,915 neiin, an zinga mi 11 hi ramdang mi (foreigner) an ni a, India ram state dang mi 16 an awm bawk.