MIC-in langtlang taka MUHCS kalpui turin Mizoram Health Care Society a hriattir

Mizoram Information Commission chuan Mizoram Health Care Society (MHCS) chu langtlang taka Mizoram Universal Health Care Scheme (MUHCS) kalpui tura hriattirin Synod Hospital nena inremna chu a thlawna pe turin SPIO a hriattir bawk.

Mizoram Information Commission chuan Advocate J. Malsawmzuala Vanchhawng-in RTI Dan hmanga zawhna a siam, a hun-a chhan a nih loh avang leh chhanna a dawn ah a lungawi lohna thu a thlen (Appeal) chu tun thla ni 9 khan ngaihtuahin, Hearing-ah hian complaint thehluttu leh Mizoram Health Care Society (MSHCS)-a SPIO leh RTI zawhna luh hunlaia SPIO te an inlan a, Mizoram Health Care Society leh Synod Hospital ten MUHCS kalpuina tura inremna an ziah copy leh detail pricing chu tun thla ni 17 (Vawiin) ralhmaa Complainant hnena a thlawna pe turin State Information Commission hian SPIO chu a thu a pe a ni.

State Information Commission in Order a tihchhuah takah hian Court ruling lo awm tawh chi hrang hrangte tarlangin, SPIO chu tunhnuah a hun taka information pechhuak turin a hriattir a, MUHCS chu mipuite hamthatna tura duan anih avang leh mipui sum hmanna a nih avangin Synod Hospital nena inremna ziahte bakah MUHCS kalphung leh a nihphungte chu thup tum lova mipuiten awlsam taka an hmuh theihna tura website-ah pawh upload zawk tura beisei a ni tih a tarlang a ni.

MUHCS kalpuinaah mipui sum hman a ni chungin sawrkar chuan thup tam tak a nei niin Complaint thehluttu hian a sawi a, Mizoram Health Care Society in Damdawi In hrang hrangte inremna a ziahpuiah thuruk anga vawn tur tih tarlanna ‘Confidentiality Clause’ dahlut telin, hemi behchhana hmang hian Damdawiin hrang hrang nena inremna an siamte chu mipui hriat theih loh turin an thup tlat a. Mizoram-a Private Hospital-te pawhin Mizoram chhung leh pawn lam Private Hospital dangte leh sawrkar inremna siam dan an hriat theih loh avangin Vawiin thlengin MUCHS an zawm theih loh phah a, a tuartu chu MUHCS zawmtu, sawrkar hnathawk, pensioner leh mipui nawlpui, damlote an nih leh si avangin Appeal hi a thehlut tih Complainant hian a sawi a. Inremna a ‘Confidentiality Clause’ dahluh tel chu Dan kalh nia sawi bawkin, hemi tlawhchhana thuneitu ten RTI zawhna an chhang duh lo leh Mizoram Assembly-a MLA te zawhna hial te pawh sawrkar in a chhang duh lo chu Right to Information Act, 2005 bawhchhiatna a nih avangin State Information Commission-ah hian a zualko ta tih a sawi a. Thutlukna siam tak chu Dan rorelna vawnhimna, mipuite tana hlawhtlinna nasa takah a ngai tih a sawi bawk.