Chhiarpui hna thawktute lo tawiawm tha turin ngen

India rama Chhiarpui neih mek buaipuitute chuan mipuite chu Chhiarpui hnathawktute tha taka lo tawiawm tura ngenin, Chhiarpui-ah hian raltlan te pawh chhiar tur an nih thu an sawi.

Ministry of Information & Broadcasting hnuaia Press Information Bureau (PIB) bultumin nimin khan Aizawl Press Club-ah Chhiarpui 2027 buaipuitu Directorate of Census Operations leh State Nodal Department- GAD hotuten thuthar thehdarhtute kawmin Mizoram mipuite chu chhiarpui neih meka thawktute tha taka thawhpui tur leh chhiarpui titute ID Card enfiah hmasa thin turin an chah a. Nimin-a thuthar thehdarhtute an kawmna ah hian Directorate of Census Operation Director Vinod P Kavle IAS chuan, chhiarpuia mahnia inziahluhna online chu nimin thleng hun hawn niin, Vawiin atangin chhiarpui atana Houselisting & Housing (HLO) kalpui tan a nih dawn thu a sawi a; Vawiin atanga HLO kalpui turah chhiarpui buaipuitute tha taka thawhpui tura mipui chahin, chhiarpui atana zawhna an rawn neihte pawh tha taka chhang turin a ngen a ni.

Chhiarpui-ah hian a thawh hnihna ah mihring chhiar tur a nih thu leh nakum (2027) lamah kalpui tur a nih thu an sawi a, mihring chhiarna ah hian ramchhunga khawsa mi tupawh, India mi leh sa ni lo te pawh chhiar tel vek an nih dawn thu leh Mizoram mi leh sa, State danga hna emaw, zirna emaw avanga awmte chu an awmna State-ah theuh chhiar tel an nih dawn thu an sawi bawk a. Thenawm State leh ram buaina avanga Mizoram a tlanchhiaa inbengbel mekte pawh chhiar tel vek an ni dawn tih sawiin, Relief Camp-a mite pawh chhiar tur an ni tih a sawi a. “India-ah awmin tui, electric leh thil dang kan hman ang min hmanpui vek avangin chhiar tel vek tur an ni,” a ti.

Chhiarpui-a mahni inziahluhna-ah hian tun thlengin chhungkaw 10,400 vel an inziaklut tawh a, la inziaklut lo tan Census.gov.in-ah inziahluh theih a nih thu a sawi bawk.