Chhiarpui hlawhtling taka kalpui a nih theih nan Larsap in thawktute theihtawp chhuah turin a chah

Mizoram Larsap, General (Dr) Vijay Kumar Singh chuan India rama Digital Census hmasa ber chu Mizoram-ah pawh hlawhtling taka neih anih ngei theih nana theihtawp chhuah turin thawktu zawng zawngte a chah a. Village Council leh Local Council te nena thawhdunna ngai pawimawh turin a chah bawk.
India rampum-a Chhiarpui, Census of India 2027 Phase-I (Houselisting leh Housing Census) hnuaia Self-Enumeration neih mekah nimin khan Mizoram Larsap, General (Dr) Vijay Kumar Singh hi Aizawl-a Lok Bhavan-ah a inziaklut a, he hunah hian Larsap chuan India rama Digital Census hmasa ber kalpui chhoh mek a ni chu lawmawm a tih thu sawiin, Mizoram-ah pawh he hmalakna hi hlawhtling taka neih anih ngei theih nana theihtawp chhuah turin thawktu zawng zawngte a chah a. Mipuite pawh he hmalakna lian tak hi ngaipawimawha, Chhiarpuia inziaklut theuh tur leh Official-te tha taka tawiawm turin a sawm a. Thingtlang kilkhawr bera chengte thlenga hmaih awm lo tura fimkhur tur leh mipuite'n harsatna an tawh loh nana a awlsam thei ang bera chhiarpui kalpui turte, hriat thiam loh a awm loh nana tan la sauh sauh turin a fuih bawk.

Larsap chuan Mizo khawtlang nun-ah midang tanpuina duhna a beh ngheh tlat thu sawiin, Chhiarpui buaipuitute chu an hnathawh a lo awlsam zawk theih nan Village Council leh Local Council-te nena thawhdunna ngai pawimawh turin a chah a. Mizoram-ah Chhiarpui tluang leh tha thei ang bera kalpui anih theih nana theihtawp chhuah tura chahin duhsakna a hlan a ni.

Chhiarpui 2027 hi India rama Digital Census hmasa ber tur niin, thawh hniha kalpui tur a ni a. Thawh khatna Houselisting leh Housing Census hi April 1, 2026 atang khan kalpui tan a lo ni tawh a. Thawh hnihna Population Enumeration hi February 2027-ah neih tan tur a ni thung a. Self-Enumeration hun hi April 1 atanga April 15, 2026 thleng a ni a, April 16 atanga May 15, 2026 thleng House Listing leh Housing Census Mizoram pumpui-ah kalpui a ni ang. Tuna Self-Enumeration hun hawn mek hi mahni In lama tih tur niin mi thahnem takin an ti tawh nghe nghe a ni.

Nimin-a Chhiarpui-a Larsap a inziahluhna hunah hian Directorate of Census Operations Official Vinod P. Kavle, Director of Census Operations, Joseph H. Lalramsanga, Municipal Commissioner cum Principal Census Officer, Irene Zohlimpuii Chongthu, Addl. Secretary GAD & Addl. State Nodal Officer, Shivam Gupta, Asst. Director of Census Operations leh Sandip Panja, Asst. Director of Census Operations te'n Larsap hnenah hian Mizorama Census kalpui dan tura ruahmanna an siamte, hmalak tawh dan leh hmachhawpte an hrilhfiah a ni.